BJP kan tlin ngei ka ring &#8211; Dr. Jitendra Singh

Union Minister of State Dr. Jitendra Singh chuan Dampa Bial MLA by-election lo awm turah an party candidate-in hnehna a chan ngei a rin thu leh BJP chu anti Kristian state a nih loh thu a sawi.

Dr. Jitendra Singh hian vawiin (29.10.2025) tlai khan Mizoram BJP office-ah press conference neiin, Dampa Bial MLA by-election ah an chak ngei tur thu sawiin, ‘BJP chuan chak lo turin inthlan kan chuh ngai lo. Chak inring lo ila keipawh ka lo kal lo ang. Tun inthlanah BJP-in thlang tling anga, kum 2028 MLA inthlanah chuan Mizoram hmasawnna atan BJP sorkar insiam tawh ngei ka ring,’ a ti.

Central Sorkarin scheme tha tak tak a ngah thu sawiin Dr. Jitendra Sing chuan, ‘Chungte chu mipui hnen a thleng phak tawh loa, mipuiin an chhawr tawk loh phah a ni. State sorkarin min thurualpui that loh chuan mipuiin hma an sawn tak tak thei lo. Hmarchhak state dang BJP sorkarna chuan hma an sawn tawh hle,’ tiin Mizoramin Central Sorkar lungrual taka thawhpui thei sorkar a neih a ngaihthu a sawi.

Union MoS chuan BJP-in thu an sawive mai mai ngai loh thu sawiin, ‘Kan rilru chhungril tak atangin kan sawi a, kan tih theih ngei turte kan sawi chhuak thin a ni. Prime Minister Narendra Modi kaihhruaina hnuaiah India ramin hma a sawn a, inthlakdanglamna a thleng. Tun inthlanah pawh kan auhla ber chu model of development a ni,’ a ti.

Zawhna chhangin Dr Jitendra Singh chuan BJP chu anti Kristian party a nih loh thu leh Mizoram chauh ni lo India ramah hmun hrang hrangah Kristian tam tak an awm thu a sawi.