BJP, Mizoram chuan vawiin (4.11.2026) hian “Save Democracy Remove Anarchy” tih thupui hmangin kawng an zawh a, Zarkawt Traffic Point atanga kalin Vanapa Hall kawt thleng kawng hi zawh a ni.
Kharna inkhawm Vanapa Hall kawta neih-ah Mizoram in-charge Bhagwat Karad chuan thu sawiin, “India ram democracy humhimna kawngzawh kan nei thei hi a lawmawm hle a, vawiinah hian India ram democracy ram ropui tak PM Modi kaihhruaina hnuaiah hian hmarchhak state-te hi nasa taka ngaihsak kan ni a, PM Modi-a khan Union Minister ka nih lai pawhin NE state-te hi tlawh turin min ti a, kei ngei pawh ka rawn kal thin. Chungah chuan Mizoram mipui mamawh hrang hrangte pawh ka rawn hmu ve a ni. Tin, Mizoram hi central hian min ngai pawimawh em em a, hnam tlem kan nih avangin kan ram leh hnam him nan border fencing Bangladesh ramriah kan nei mek a, dan loa Mizorama lo lut tur te kan awm loh nan vawiinah hian central chuan min hung sak a ni,” a ti.
BJP, Mizoram President Dr. K Beichhua pawhin thu sawiin, “Vawiina democracy humhimna kawngzawh leh tharum hmanga sorkar siam tumna duh lohna lantir a lo kal zawng zawngte chungah lawmthu ka sawi a ni. Vawiin ah hian SIR hi Mizoramah pawh tha tak leh tluang tak a kalpui a ni a, India ramah phei chuan a kalpui tha ber pawl state kan ni pha hial. Mizoramah pawh hian he SIR kalpui a nih avang hian voters sing 3 chuang (3.89%) vel paih a ni,” tiin vote paihte hi a then chu hmun danga pem te, mitthi tawh leh hmun khat aia tam a vote neite an nih thu a sawi.
Dr. K Beichhua chuan, Mizorama vote paih zawng zawng leh India rama vote paih zawng zawng belhkhawma crore 13 ah hian BJP voters tam tak an awm ve tih sawiin, “Congress vote chauh paih a ni lo tih chu tupawhin kan hriatthiam ka ring. Amaherawhchu, ram leh hnam hmangaihna avangin dan dik taka SIR kalpui a nih theih nan BJP chuan huaisen tak leh dik taka vote nei thei te chauhin Vote an neih theih nan hma a la ta a ni. Chuvangin, SIR hi BJP tih chhuah a ni loa, Congress Sorkar hunlaia an dan siam tawh a ni. Chutiang chuan India khua leh tui dik takte’n vote kan neih theih nan hma a la mai a ni,” a ti.