Bolero thar tlangzarh a ni

Mana Motors chuan Mizoramah a rualin Mahindra Bolero leh Bolero Neo thar an tlangzarh a, Mizote mai bakah India rama lirthei hriat hlawh sa tawh a nih avangin an lak luh hmasakte an hralh chhuak leh nghal vek thei dawn tih an sawi.

Mahindra Bolero leh Bolero Neo hi vawiin (14.10.2025) hian an showroom, Bawngkawnah Asian Armwrestling champion Denic Lalruattluanga leh Mana Motors Dealer Principal Dr Franklin Lalrinngheta’n an khuh hawng a, October 6 khan India ramah Mahindra chuan tlangzarh a lo tlangzarh tawh a ni.

Kum 2000 khan a vawi khat nan Mahindra-in Bolero a tichhuak a, car an siam chhuah tawh zinga an hralh theih ber pawl ni rengin 2021 khan Bolero Neo an tichhuah tel bawk a, a vaiin nuai 16 chuang an hralh chhuak tawh a ni.

Mizorama Mahindra full range dealer Mana Motors neitupa Dr Marina chuan, Mizorama motor lar ber sawi dawn ta se Bolero a nih a rin thu a sawi a, kawng chhia leh khawpui kawngah hman kawp theih a nih avangin mi tam takin motor tha bera an ngai a ni, a ti.

Dr Marina chuan, ‘Bolero hi chu Mizoten an hriat chian sa tawh a nih an duh niin ka hria a, kan lawm hle. A rin tlak avangin sorkar pawhin a hmang nasa a. Tunah hian heta awm sa leh Mizoram pana lo kal mek nen 20 chuang chu a zo nghal vek dawn a ni,’ a ti.

Hetih lai hian variant hrang hrang zinga a sang ber leh man to ber erawh thla thar atang chauhin an la lut thei dawn ti a sawi.

Bolero pangngai chhuak thar hi Mizoramah a man tlawm ber cheng Rs 9,05,837 a ni a, a man to ber Rs 10,89,068 a ni ve thung a, Bolero Neo chhuak thar man to ber cheng nuai 9,70,159 a nih lain a man to ber Rs 11,20,334-in a lei theih a ni.

Bolero hian fak a hlawh hle rualin tunlai car inelna sangah a chhung lam an duan dan duhkhawp lohna a awm fo thin. Tuna a chhuak tharah hian a hmel tidanglam tam lo mah se, tunlai mil turin a chhung lam erawh a hma aiin an thuam changkang tawh hle a ni.

Infocars hotupa Vanlalmuana chuan, ‘Bolero pangngaiah hian rawng dum a awm tawh dawn a, a grill thar vuahin a bumper-ah thir an hmang bawk. A chhung an chei nalhin an thuam changkang a, kawng chhia ngam tak chungin khawpui kawngah pawh chuan nuam leh zual tura siam a ni.

‘Bolero Neo hi khaw chhunga hman tur deuha siam ni mah se kawng chhiaah pawh a hman tlak hle a. A chhung chei lamah an insawrbing viau a, thiamna dang an bilh tel viau bawk. Mi pasarih thut theihna ve ve a nih laiin a sei zawng metre 4 tling lova siam a ni a, GST tharah a man a tlawm phah hle dawn a ni,” a ti.

Bolero tharah hian 1.5 litre mHAWK75 turbo engine vuah a ni a, Bolero Neo tharah 1.5 litre mHAWK100 turbo engine vuah a ni ve thung a, diesel hmang ve ve tura siam a ni.