Vawiin (13.11.2026) chhun dar 12:00 khan Rajiv Nagar-I VC House-ah martar Rohmingthangi thlan leh a hriatrengna tihchhiat chungchang sawiho a ni. Sawihona hun hi Dampa Group YMA President B. Ramngaihzuala chuan a kaihruai a; Central YMA, Mamit Sub-Headquarters YMA, Dampa Group YMA, Rajiv Nagar VC-I leh VC-II te, Joint YCA Rajiv Nagar OB te bakah Rajiv Nagar Branch YMA OB te an tel.
CYMA President chuan Rajiv Nagar-a missionary Rohmingthangi rawng taka thah a nihna hmun chhinchhiahna tihchhiat leh a sakna hmanrua rukbo a ni thin chu demawm a tih thu sawiin, “Hetiang thil hi a thlen nawn leh a rem tawh lo. Nl. Rohmingthangi thah a nih avanga Mizo mipuite rilru a nat tawh tehreng nen, amah hriatrengna tichhe zawnga khawsa an awm leh zel chu CYMA chuan a hrethiam tawh dawn lo,” tiin YCA hruaitute chu an mi leh sate thunuh turin a chah.
R. Lalngheta chuan Mizoram khua leh tui dik takte chu inthliarna awm loa tha taka awmtlan an duh thu sawiin, “Thla hmasa lawka NGO Co-Ordination Committee neihah pawh YCA hruaitute special invitation-a sawm ve an ni. Mizote chu tihnuam tak kan ni. Arunachal Pradesh-a Chakma-te chan loh ang hamthatna tam tak Mizorama Chakma-ten an chang,” a ti a, Rajiv Nagar leh a chhehvela VC-ten Kristiante MGNREGS hlawh an cut sak thin nia thu thang awm chungchangah VC-te chu insawifiah turin a phut.
He hunah hian Mamit Sub-Headquarters YMA huamchhunga Chakma-ten Mizo laka harsatna hrang hrang (pawikhawihna) an thlen thin chu pawi an tih thu leh, tun hnuah hetiang thil a thlen leh chuan darkar 48 chhunga pawi khawihtu zawnchhuah an inhuam thu leh, hma an la lo a nih chuan an chunga engpawh thleng se sawi buai an tum loh thu tarlanna intiamkamna chu Rajiv Nagar leh a chhehvel hruaituten an ziak.
Intiamkamna hming ziaktute :
1.Surjolal Chhakma (President, Rajiv Nagar V/C)
2.Dipankar Chhakma (President, Village Council Rajiv Nagar-II)
3.Shanti Pryo Chhakma (President, Andermanik V/C)
4.Arun Moy Chakma (President, Young Chakma Association, Rajivnagar Zone)
5.Monan Chakma (President, Mizoram Chakma Students’ Union, Rajivnagar Zonal Hqrs.)
He intiamkamna hi Dampa Group YMA President Pu B. Ramngaihzuala leh Secretary Pu Vanlallawma ten hriatpuitu atan hming an ziak bawk a ni.