Vawiin (30.10.2026) khan Mizo High Sikul Field-ah Art & Culture leh Central YMA te tangkawpin an buatsaih 14th Chief Minister’s Running Trophy in Cultural Dance Competition khar a ni a, Chief Minister Lalduhoma’n a hmanpui.
He intihsiakna hi kum 1991 atang khan kum khat danah neih thin a ni a, kum 2016 atang khan harsatna hrang hrang avangin kum 7 chhung chawlhsan a ni a. Kum 2024 atang khan chhunzawm a ni leh ta a, kumin hi a tum 14-na a ni. Pakhatna chu Chanmari West Branch YMA niin, pahnihna chu Pawlrang Branch YMA an ni.
Thu sawiin Chief Minister chuan, “Culture hi kan phuahchawp a ni lo va, Pathian min pek a ni a, a humhim hi kan mawhphurhna a ni. Ram hmasawnna hna kan thawk zel a, ram changkang nih ve kan tum a, target te kan siam a, kan kal zel ang. Nimahsela, kan culture leh kan identity erawh chu kan venghim zel ang a, kan bosan a rem ve lo. Chuvangin thangtharte hnena kan hlanchhawn a, zirtir zel hi kan tihtur a ni,” a ti.
Kan hnam zai, tlar thum zai te, chai hla leh chai lamtea biak ina Pathian fakte hi a hun tawha a hriat thu sawiin, “Hnamdang tihdan entawn a, anmahni ang nih chak niawm taka an hnamzia lo kalpui ve zel hi kan tih tur niin ka hre lo. An hlate kan letling a, kan sa uar viau. Kan irawm chhuak hla ngei hi i uar zawk ang u. Culture min petu Pathian hi kan culture angin bia ila, fak ila a tha berin ka hria,” tiin Mizo hnamzia chawi nun zel a tul thu a tarlang.
Cheraw leh Chailam hmangin YMA branch 34-te kuminah hian an inel a, an zinga branch 4 hi Aizawl pawn atanga rawn tel an ni.