Chief Minister hoin an thlirho

Vawiin (16.10.2025) hian CM Conference Hall-ah Chief Minister Lalduhoma hoin Assam Rifles chhuahsan ram hman dan tur ngaihtuahtu Advisory Committee on AR Land-te chu a tum thumna atan an thukhawm a, rawtna lut hrang hrangte an thlirho.

Meeting-ah hian master plan siamthat chu an thlirho a ni. Ruahmanna thar ber ang chuan a ram zawng zawng zaa 39.33 hi mipui mamawh hmunhma sakna (built -up area) tur niin a dang zawng zaa 60.67 chu green area a ni ang.

Committee hian Aizawl Square, ring road ni nghal siam te, a ram chhuah lama bypass road, hmar lamah Saron atanga kal, Dak inpui bula chhuak sial te, mi 2000 lenna Convention Centre, a hnuai lam lirthei park-na lian tham tak nei sak te, kawngpui kam hmun hniha Mini Park siam te, two wheeler parking siam te, Heritage Court siam te, Bypass road kiang Venghlui lam hnaiha Multi Level Car Parking leh Open Air Theatre sakte a pawm.

Khawpui laili chawmtu turin Baja tlanga Tui dahkhawlna sak leh chhuah lam bypass road kianga 33 KV Sub Station dah an remti. Tuna kawngpui awmsa hi a theih ang anga tihzauh ni se an ti a, lungphun awmsate vawnhim tha an ti a, canteen kuala War Memorial hi MINECO-a sawn an rel.

Meeting hmasaa, Civil Hospital, Aizawl tihzauh nana Aizawl Police Station awmna hman a nih theih nan Police Station hi AR Hospital tlangah sawn ni se – tia an lo sawi tawh chu, a hmunhma tura an tinzawnah a leng thei dawn lo. Chuvang chuan, Aizawl Police Station hi sawn phei chiah an ngai leh ta lo a, out post dah chi zawk nia ngaih a ni.

Khatlaa Assam Rifles ram mawng lam, Mizoram Secretariat tihzauh theihna lai tur leh Loch House, tuna Mizoram Sorkar kuta awmta te hi inthlengpui dil ni se, a hlawhtlin chuan Chief Minister’s Office leh residence sawn phei nana hman ni se, an ti. McDonald Hill, Zarkawta CM Office-ah meeting a tam thin a, Secretariat lam atanga rawn kal hi traffic jam vangin a hautak thin a ni. He harsatna pumpelh nana Chief Minister hmunhma MINECO lama suan phei mai hi thaa ngaih a ni.

Babu tlanga AR ram chhuahsan, Zarkawt khawtlangin enkawl an dil chu a neitu nihna nei lo va Green Park atana an enkawl theih dan tur inkaihhruaina GAD lamin lo duang se, an ti.