News

Vawiin (2.10.2025) chhun khan Chief Minister Lalduhoma chuan a bial Thenzawl Vengthlang Branch YMA kum 25 na (Silver Jubilee) lawmna, Victoria English School-a buatsaih chu khuallian niin a hmanpui.

Chief Minister chuan, Thenzawl Vengthlang YMA member leh khawtlang mipuite Jubilee chibai a buk a, branch lo kaihruai tawhtute fakin vawiina hruaitute pawhin kum tam tak lo la kal leh tur tana hmathlir thui tak nei chunga kaihruai turin a chah.

Thenzawl Peace City din tum a chak taka hmalak mek a nih thu sawiin Lalduhoma chuan, ‘Hei hian nasa takin kan khaw hmelhmang a rawn thlak dawn a. Mipuite inhawng taka kan inbuatsaih a ngai dawn tih i hre lawk ang u,’ a ti.

Vengthlang branch hi kum 2000 a din a ni a, a hma chuan Bazar Branch hnuai a section pakhat a ni thin. Tunah hian branch chhungah in ding 302 awmin an zinga 290 hi luah lai an ni a, mihring hi 1450 an cheng mek a, an zinga 780 hi hmeichhia an ni. YMA member hi 925 an awm mek.