CM-in buh thar lawmna hmanpui

Vawiin (15.11.2025) hian Chief Minister Lalduhoma chuan Tualte khuaah JH Lalnunmawia buh chhun fin leh buh thar lawmna a hmanpui a, Agriculture Minister PC Vanlalruata leh Dy. Speaker Lalfamkimaten an tawiawm.

Chief Minister chuan hetiang hun hi vawiina kal khawmte’n an la hmuh a rin loh thu sawiin, “Kan hmu leh pawhin ka ring chiah tawh lo. A tam em avangin Mizo buh tam lam chhiar danah pawh hming a nei tawh lo. Chuvang chuan he ni hi a hlu a ni,” a ti a, a tharchhuaktu JH Lalnunmawiate chhungkua a lawmpui thu a sawi.

Lalduhoma chuan JH Lalnunmawiate chu midangte tana malsawmna thlen thintu an nihna Pathianin mal a sawm nia a hriat thu sawiin, midangte tana malsawmna ni zui zel turin a ngen a ni.

Sorkarin kuthnathawktute a ngaipawimawh tih sawiin Chief Minister chuan, “Sawhthing thartute iptea support price lut ringawt pawh hi a tam tham hle. Hnathawktu, mi taimate tan kawl a eng mek a ni,” a ti.

JH Lalnunmawia hian Tualte khuaa Artlang ramah tin sawm leh pasarih hmuna zauvah buh a ching a, tin 3,600 a thar chhuak a, phur 1,200 a ni. Mizo buh tehkhawng anga sawiin mau tlawn zawn hnih leh silai zawn chhun fin anga tam nia sawi a ni.