Vawiin (16.10.2026) hian Chief Minister Lalduhoma chuan Ngaizawl khawtlangin Khawdo Kut an buatsaih chu khuallian niin a hmanpui. Bialtu MLA H. Ginzalala, chu khualzahawm a ni.
Thu sawiin Chief Minister chuan, “Tualpui khaw mite tan chuan Ngaizawl hi mahni khua ang maia kan en a ni. Khaw mipuite pawh u leh nau anga kan ngaih an ni. A khaw ram, a tlang dung leh ruamte hi kan mitthla kual thei vek. Ka lung tileng thintu, ram ngaihawm tak a ni. Vawiinah rawn kalna remchang ka neite hi ka lawm a, khawtlang mipuiten hlim taka min lo mikhual avangin a hahdamthlak pawh ka ti hle,” tiin kut chibai a buk. CM hi Tualpui khaw chhuak a ni.
A tirah thlai thar pangaah support price an pek thu sawiin Lalduhoma chuan, “Tun hnaiah thlai dang paliah kan pek belh. A vaiin thlai thar pakuaah support price kan pe a, kuthnathawktuten a rate hre sain thlai in lo ching ta a ni. Khaw taima Ngaizawl pawhin in tangkai ngeiin kan ring. Heng sorkar scheme tha tak takte hi lo chhawr ngei ang che u”, tiin a chah.
CM chuan sawi chhunzawmin, “Khawdo Kut hian ram leh kan hnam hmangaih a pawimawhzia min hrilh nawn se, ram leh hnam ding chhuak ni tura inbuatsaih a tulzia min zirtir se, kan tu leh kan fa lo la awm zel turten hlim taka he kut hi an rawn hman zui ve zel theih nan – hmathlir fel tak nei chungin, kawng dik takah kal i tum tlat ang u,” a ti.
Lalduhoma chuan SASCI 2026 – 27 Part – I (Untied) ah Ngaizawl to Tualpui kawng laihna tur cheng vbc. 5.36 dah a nih thu a sawi a, Ngaizawl H/S buildingah zirlai naupangte an len tawh loh avangin H/S building zauh nan cheng nuai 25 a pe.
Kut hi Ngaizawl khelmualah hman a ni a, VC Vice President A. Thangsuanpau, chuan a kaihruai a, Bialtu MLA leh VC President Robert Khamkhanpau pawhin thu an sawi.
Khawdo Kut (Khuado Pawi) hi Mizo hnam peng Paite kut ropui bera ngaih a ni a, chanchin hlui zirtu (historian) te chuan AD 1400 vel atangin he kut hi an la hmang tawh thin niin an ngai.
Ngaizawl hi kum 1927 ah Burma atanga rawn tla thla Paite hnamten Tualpui lal ram chhungah, khatihlaia Tualpui lal Thanherhna phalnaa an din a ni. A hnuah lal Thanherha fapa naupang zawk Khenchhuma chuan a awpzui. Rambuai lai khan Khawzawlah khawm an ni. Nimahsela, Jhum Permit hmangin Ngaizawlah hian bawk an khawh zui zel a, chuvang chuan 1927 atanga vawiin thlengin mei a mit lo tia sawi theih a ni. Tunah hian in 205 an ni mek a, mihring 1,200 vel an cheng.