Vawiin (27.10.2026) hian Chief Minister Lalduhoma chuan a office-ah Indian Railway Chief Administrative Officer Anjani Kumar Maurya leh a thawhpui Railway-a mi pawimawhte a kawm a, Sairang leh Hmawngbuchhuah inkara rel kawng kaltir an tum dan a thlirpui.
Chief Minister hian Mizorama Railway lamin hma an lakna lama a rawtnate an ngaihpawimawh thin avangin Railway Minister Ashwini Vaishnaw chungah lawmthu a sawi a, “He rel kawng kal tur hi mipuite tana a tangkai thei ang bera a kal theih nan rawtna hi kan nei thin a ni,” a ti.
Railway hotute sawi danin Sairang – Hmawngbuchhuah inkar hi kms. 230.110 a thui ni turin an rawn duang a, station hi 20 a awm ang a, rel hi darkar khata kilometer 130 a chaka tlan theihna turin an hisap a ni.
Station hming leh a paltlang ram hmingte chu a ram neitu khaw hming dik tak zel puttir turin Chief Minister hian a chah a, eng emaw han tihdanglam duh tlem azawng rawtna a nei bawk.
Chief Minister hi MLA Lt. Col. Clement Lalhmingthanga, GAD Principal Secretary Sudir Kumar, GAD Secretary Vanlaldina Fanai leh Aizawl DC Lalhriatpuia ten an tawiawm.