Vawiin (4.11.2026) chhun khan Chief Minister Lalduhoma chuan CM Conference Hall-ah Administrative Training Institute (ATI)-a foundation training nei mek Mizoram Secretariat Service (MSS) officer-te a kawm a, a tul bak bak office-ah kan awm khaw tlai fo tur a nih loh thu a sawi.
Hun vawn dik hi a that thu sawiin Chief Minister chuan, “Kan thawhpui leh kan hnuaia mite hre rengin, a tul bak bak office-ah kan awm khaw tlai fo tur a ni lo. Hna tam tak hi chu office hunbi pangaia thawh theih an ni a, tlai taka kal a, tlai taka bang loin, a hun taka thlen a, a huna haw mai tur a ni,” a ti.
Lalduhoma chuan MSS-te chu sorkar file kalpuinaa note siamtu pawimawh ber zinga mi an nih thu sawiin, “Sorkar dan leh a amendment te in hriatchian hle khan thutlukna siam kawngah kan tangkaipui thin,” tiin khawvel a inthlak chak em em a, thil thar tha zawk ngaihtuah chhuak thiam officer an mamawh thu a sawi.
Hmathlir fel tak neiin an kal thu sawiin Chief Minister chuan, “Flagship scheme te kan nei a, khang kan flagship te kha kan ngaipawimawh a, sorkar hnathawkte pawhin lo ngaipawimawh ula ka duh. Mahni chhungkua theuh vil tha ila, chhungkaw tha i din ang u. Chu chu khawtlang leh ram tan thil tangkai tak a ni,” tiin MSS officer-te hi a fuih a.