Crop insurance a kalpui theih dawn &#8211; PC Vanlalruata

ZPM chuan vawiin (27.10.2025) khan an office-ah chhung inkhawm an hmang a, thusawitu Agriculture Minister PC Vanlalruata chuan crop insurance a kalpui theih dawn tak thu leh kut hnathawktute’n an thawhrim rah an seng mek thu a sawi.

Agriculture Minister chuan ZPM-ten an au hla ber thlai thar lei chu a takin an kalpui mek tih sawiin, ‘Tun hnaiah sawhthing lei leh hralh chungchangah thil fel hlel a awm tih hriain sawrkar chuan a chhui chiang mek a, pawn lamah pawh mi thahnemngaiten tih tak zetin min lo veipui a, a lawmawm hle a ni,’ a ti.

Kuminah sawhthing rate a chhe hle tih sawiin PC Vanlalruata chuan, ‘Kg. khat Rs 50-a hralh kha a huphurhawm hle a ni. Amaherawhchu, kan au hla a nih avangin tihhlawhtlin ngei tha kan ti a, kan Chief Minister hoin meeting kan nei a, kan intiam ang ngeiin tihhlawhtlin tha kan ti a, kuthnathawktuten an thawh rim rah an seng mek,’ tiin kut hnathawktute an lawm thu a sawi.

Tuna kan Chief Minister ni mek hian hman atang tawhin kut hnathawktute hmakhua a ngaiin a vei em em tih sawiin Agriculture Minister chuan, ‘A tlangau hla ber pawh budget-a thlai thar leina dah leh crop insurance kalpui a ni. Tunah hian State Level Coordination Committee on Crop Insurance kan din tawh a, tender-te kan chhuah a, chutah chuan TATA AIG General Insurance Company Ltd. hi kan thlang fel tawh. Mizoramah Crop Insurance kan kalpui thei dawn ta,’ a ti.