MNF chuan vawiin (19.10.2026) hian an office-ah chhung inkhawm an hmang a, thusawitu MNF Sr. Vice President Dr. R Lalthangliana, MLA chuan kutphuara an awm laia chhui ngei tura ZPM Sorkar a ngen ngawih ngawih thu a sawi.
Dr. R. Lalthangliana MLA chuan ZPM worker thenkhatin MNF Sorkar kha corruption a fihlim lo, hlemhletna neiah an puh fo tih sawiin,”Thudik lo a ni tih ka puang a, dawta inpuh chhiatna mai mai a ni. Tunah hian dawta min puh fotute khan thuneihna an chan lai a ni a, a chhuitu department zawng zawng pawh an thu hnuaiah a awm lai a ni. Keini kut phuara kan awm lai tak hian mipuiin thudik an hriat chian theih nan min chhui ngei ngei turin ZPM Sorkar ka ngen ngawih ngawih a ni. Pathian leh mipui zarah rorelna MNF-in a chelh leh hunah hlemhletna/corruption hian chhete pawha hmun a nei dawn loa, eirukna tireh tura awmze nei taka hmalakna mumal tak kan duang dawn,” a ti.
Thudik lo hmanga mi bum leh tih chi-ai tum a, nitin hna a neitute bula awm chu a ṭihbaiawm thu MNF Sr. Vice President chuan, “Hetiang politics khelhna hmanrua a hmang fo thinte hi an daih rei ka ring lo. Politics-a opponent-te dawt leh thu belhchian dawl lova beitute hi nakin lawkah mualpho takin an awm thei tih hria ila, MNF chuan kan ching ve tur a ni lo. Health Care Bill MNF-in a bat ral sak an tih fote hi dawt hmanga inbeihna a ni,” tiin health care bill kha an hun laiin naia khat pawh bat ralsak a awm loh thu a sawi.