News

Chief Minister Lalduhoma chuan Mizoram chu Lakshadweep dawta eirukna tlemna berna state a nih thu leh eirukna chu hmasawnna daltu a nih thu a sawi.

Vawiin (27.10.2025) atanga hman tan tur Vigilance Week, 2025 puala a thuchah a sawiah Chief Minister chuan, ‘Vigilance Week hi kumtin Sardar Vallabhbhai Patel-a piancham, October 31 huam chhunga hman thin a ni. Hrui khat vuana eirukna leh hlemhletna do tura mipuite zirtirna atan hma ni thin. Mizoram Sorkar Vigilance Department pawhin kum 2018 atangin kumtin he hapta hi a hmang thin. Eirukna hi hmasawnna daltu, mipuiten an chanvo dik an chan theih lohna bul, Pathian huat zawng a ni,’ tiin mahni chhungkua theuhah eirukna do hna huai taka kalpui tur leh eirukna sum atanga lei thil reng reng duh lo ngam turin mipuite a sawm.

Lalduhoma chuan eirukna laka fihlim theihna turin sorkar laipuiin Prevention of Corruption Act, 1988 a siam thu sawiin, ‘Sorkar hnathawkte chu CSS Conduct Rules, 1964 danin a phuar. Prevention of Corruption Act, 1988 hnuai-ah Anti Corruption Bureau (ACB) leh Mizoram Lokayukta din a ni tawh. Kumin chhungin eirukna leh a kaihhnawih thilah ACB chu preliminary inquiry tih phalna 10 pek an ni tawh a, regular case siam phalna pawh 5 pek an nih tawh. Transparency International in corruption hluar lam tehna Corruption Perception Index, 2024 ah India chu ram 180 zingah 96 naah a dah a, kum 2023 aiin pathumin hma a sawn. Transparency International leh NITI Aayog data behchhana CMS India Corruption Study in a hmuhchhuah danin Mizoram chu Lakshadweep dawta eirukna tlemna ber state kan ni. Thil chhinchhiah tlak leh chhuanawm tak a ni,’ a ti.