Eirukna laka hming hliau kan la awm lo

Vawiin (23.10.2025) hian ZPM Aizawl East-II Block chuan Dawrpui Multipurpos Conference Hall-ah khawmpui an hmang a, an hun hmanpuitu Chief Minister Lalduhoma chuan ZPM kalkhawmna eirukna-a hming hliau an la awm loh thu a sawi.

Chief Minister chuan vawiin thlenga Minister leh MLA-te zingah eiruknaa hming hliau an la awm lo hi a lawmna a nih thu sawiin, ‘Kan ram hruaituten hriselna tha leh finna te, rinawmnate an neih zel theihna turin party mite pawhin i tawngtaipui thin ang u. Kan hmalakna leh kan hmachhawp hrang hrangte tun maiah kan hmu hman dawn lo, kum 5 chhung hian tam tak hmuh hman loh tur kan nei a ni. Chuvang chuan a hlawhtlinna hmel hmu tur chuan kum 10 aia rei rorelna fawng kan chelh a ngai a, chutiang tur chuan party mite i ṭang sauh sauh ang u,’ a ti.

ZPM kalkhawmna chu an felfai tur a nih thu sawiin Lalduhoma chuan, ‘Zurui nena inchawmpawlh lutuka function hmante hi thil mawi a nih loh bakah a zahawm loh. Kan party pawh kan fihlim chho sawt hle a, a lawmawm tak zet a ni. Chutiang bawkin kan party mi leh sa contract hnathawkten an thawk chhe tur a ni lo, mi pahnih khat lek hna tha lo, lo ti zeuh an awm hian a lar duh hle,’ tiin an sorkar hnua hnathawhte a tha tlangpui tawh nia a hriat thu a sawi.