Mizoram chhung leh pawn atangin EverHome Youth Icon 2026 Audition Round paltlang mi 139 an awm a, November 3,2026 (Thawhlehni) zanah first round intihsiak tan a ni ang.
LPS Vision Production buatsaih zai intihsiakna EverHome Yoth Icon-ah hian application form lak chhuah ngai loin virtual audition hmangin intihsiakna neih a ni a, mi 884 ten Telegram leh WhatsApp kal tlangin an zai video te an thehlut. Judge-ten uluk taka an endik hnuah audtion result an peih fel ta a, mi 800 chuang atangin round hmasa ber intihsiak hmachhawn mi 139 thlan chhuah fel an ni ta a ni. Audition patlangte hming hi LPS Facebook leh Instagram-ah te tar chhuah a ni.
Mizoram chhunga district hrang 11 atangin audition round patlang an awm vek a; Aizawl District in ngah berin 48, Champhai District atangin 8, Hnahthial District atangin 8, Khawzawl District atangin 8, Kolasib District atangin 14, Lawngtlai District atangin 3, Lunglei District atangin 14, Mamit District atangin 8, Siaha District atangin 3, Saitual District atangin 9 leh Serchhip District atangin 13 bakah Manipur atanga 2 leh Assam atang mi pakhate te an tling a ni.
First round intihsiak hi November 3,2026 (Thawhlehni) zanah neih tan a ni dawn a, contestant-te chu an zai zanah dar 7 ah LPS Office, Zarkawt thlen tawh tura ngen an ni. Zai rem nan guitar emaw keyboard emaw hman theih a ni a, a pahnihin hman kawp a rem dawn lo. Contestant-te chuan hla chang 1 leh a thunawn emaw thunawn nei lo chu chang hnih an sak phalsak a ni.
Tarlan tawh thin angin, EverHome Youth Icon 2026-ah hian judge pathum – Victor Vanlalhruaia, Rosy K. Remsangpuii leh Andrew Laltlankima te chu zai intihsiak an endik leh a, Youth Icon atana thlanin cheng nuai 2 a dawng dawn a, pahnihnain cheng nuai 1 leh pathumnain cheng sing 7 an dawng ang.