News

Vawiin (31.8.2026) hian ZPM Party chuan an office-ah chhung inkhawm an hmang a, thusawitu Rajya Sabha MP K. Laltluangkima chuan, “MP lakluh hlimah ram hruaitu mi pawimawh tak tak paruk lai ka hmu hman a, chung zingah chuan Union Home minister pawh telin, Pu Amit Shah hi kan CM leh kohhran hotute zuk hmuh hnua hmu ka nih avangin, ‘FCRA chungchang JPC kuta dah a nih chhan hi kan CM leh kohhran hruaitu ten an lo hmuh vang che kha a ni em?’ ka ti kher a, Pu Amit Shah hian, ‘Aw ni e’ tiin min chhang. JPC-ah hian Lok Sabha leh Rajya Sabha MP 10 ve ve te thlangin an ngaituah dawn a ni. Tin, FCRA chungchang hi Pi Indira Ganchi hunlai atang tawha ruahmanna lo awm tawh a ni a, kan Congress unaute hi an bang bik lo a ni,” a ti.

K. Laltluangkima chuan ZPM sawrkar kal tawh chinah ‘kann ti ang’ an tih te, manifesto-ah pawh an dah lem loh an tih ṭhat tak tak te a awm tih sawiin, “Sawrkar administration-ah te langtlang tak leh hna lak pawh dik taka lak a nih danah te hian kan sawrkar mek hi a ti tlṭha thawkhat hle. Kut hnathawktute khaichhuahna lam department hrang hrangte pawhin theihtawp kan chhuah a, a tawi zawngin sawrkar department zawng zawnga kan hmalakna te hi a lungawi thlak thawkhat hlein ka hria. Kawngpui ṭha leh tlo chungchang bikah hian theihtawp chhuah kan ngai nasa hle a, central sawrkar-ah pawh a theih anga nasaa min pui turin MP ka nihna atang pawhin hmalak ka tum a ni. Mipui tana ṭha tur leh kalphung thar zawka kalpui pawh kan ngah hle; buhfai buk dik te, aikal lak tihtawp te, pension hlawh dik lova lak tihtawp te, Aizawl khawpui chhehvela rambuai chinfel te, sawrkar kal tawh te anga party worker-te work order humsa cancel sak te kan ti ve lo te, sawi vek sen loh khawpa tam sawrkar kaltate tih ve loh a awm,” tiin kum 2028-a an sawrkar nawn theih ngeina tur thil tam tak an tih thu a sawi.