Vawiin (18.11.2026) chhun khan Champhai District Civil Supplies Officer, Asst. Controller, Legal Metrology leh District Consumer Union-te ṭangkawp chuan Champhai District chhunga filling station hrang hrangte dispensing pump metering unit (petrol pek chhuahna leh a meter) te a dik leh dik loh an endik bakah, insakna hmanrua iron-rod standard size leh weight a nih leh nih loh an enfiah.
Filling station endikah hian meter dik lo hmang emaw sawisel kai an awm lo. Insakna hmanrua iron rod chu Legal Metrology Department-ten standard size chauh zuar turin thu an pe tawh. Iron rod standard size leh weight ni lo zuarte chu hralh chhuak tawh lo tura hriattir niin, dawr neitute hnenah standard size chauh mipui hnenah hralh chhuak turin order an pe. Buk loa iron rod hralh chhuah pawh khap a ni.