Nimin (24.10.2026) khan Lunglei Beautification Committee (LBC) member-te – Minister Lalrinpuii, Lunglei High Powered Committee (HPC) Vice Chairman & LBC Chairman V. Malsawmtluanga, MLA; Lunglei Municipal Council (LMC) Executive Councillor Zorinsanga Hmar, Councillor R. Lalremsiama leh Lalmuanpuii Renthlei te chuan Lunglei hmar lam kawtchhuah, Pukpui daia khualzinte lo lawmna tur, Leitlangpui Welcome Gate siamna tur hmun chu a hmunah kal chilhin an enho. Pukpui Local Council ai awhte leh political party hruaitute’n an ṭawiawm.
Lunglei Beautification Committee-ah hian Lungleia MLA pali te bakah, LMC councillor zawng zawng (mi 11) chu member niin, an hma lakna hmasa ber atan Lunglei khawpui luhka hmun hnih – Pukpui khaw dai leh Zobawk khaw daiah te “Welcome Gate” hi siam turin an ruahman. Minister Lalrinpuii chuan he welcome gate siamna atana senso tur hi member-te’n an thawh khawm thu sawiin, hemi bakah hian Lunglei khawpui chhung chu mawi taka a lan theihna turin lungrem (retaining wall) awmte mahni bial ṭheuhvah a bialtu MLA leh councillor ṭang hova rawng hnawih thar leh an tum thu leh hmun ṭhenkhatah phei chuan hma lak ṭan a nih tawh thu a sawi.
Leitlangpui Welcome Gate hi Arch. C. Lalhmangaihzuala, CCK Architecture, Salem Veng, Lungleiin a duan (design) niin, a siam dan tur ruahmanna a sawi fiah nghal. He Leitlangpui Welcome Gate siam nan hian cheng nuai 11.73 ruahman chhin a ni. Gate siam tur hi a liang san zawng hi feet 18 leh a chanve, a chhipah fit 27 leh a chanve leh a zau zawng a chhung lamah fit 31 tura ruahman niin RCC hmanga siam tur a ni. Lung leh thing hmanga chei tur niin, thuziak eng thei (LED signage) leh a chhehvel kap eng tur eng vuah tur a ni. Khualzinte hip leh titlangnel thei turin Tawlhlohpuan zia leh Mizo hnam ze tar lang thei thil hrang hrang hmanga chei mawi an tum.