Hnahsin Kut chhimtu an tam

Hnahsin Kut Organising Committee tarlan danin, Champhaia Hnahsin Kut hman zawh tak kha mi nuai 1.2 velin an chhim nia chhut niin, kūt tawp zan Mualnuam Concert kha mi 42,000 velin an chhima ngaih a ni.

Kūt chhimtu thlen man atanga Champhaia hotel, guest house leh homestay-te sum lakluh belhkhawm chu cheng nuai 140 vel a ni. Khualzin an thlen zat belhkhawm mikhual thlengtute sawi dan chuan – Mizoram chhung mi 5,100, Mizoram pawn mi 805 leh India ram pawn mi 56 an ni. Kūt chhimtu tam zawk chu chhungte, thiante leh thawhpuite inah an thleng thung.

Taxi (four wheeler leh two wheeler) te, motor sil, restaurant, venue pawna kawng sir leh mahni compound chhunga thil zuar te, Champhai Bazar, Aizawl Champhai kawnga hotel/restaurant-te leh nepnawi zuar te, Zokhawthar leh a chhehvela lirthei leh sumdawngte inhralhna zawng zawng chu cheng nuai 100 chuangah an ngai. Hnahsin Kût Venue chhung stall neitute inhralhna belhkhawm chu cheng nuai 200 vel a ni. Hnahsin Kût vanga Champhai leh a chhehvel bawra sum che vel leh rawn lut chu cheng nuai 1,500 niin an chhut.

Hnahsin Kut Organising Committee chuan Hnahsin Kût buatsaih chhan ber pakhat chu Champhai leh a chhehvelah khualzinten sum thahnem tak an rawn thlauh a, khawtual miten a zar an lo zo a nih thu tarlangin, ‘Hemi kawngah hian kumin Hnahsin Kût hi a hlawhtling thawkhat niin kan hriaa, organizers lam pawh kan lawm hle. Champhaiah khualzin rawn kal an thahnem chho zela mikhual chunga thatchhuah kawngah pawh hma kan sawn zel hi a lawmawm hle a ni,’ an ti.