News

MNF chuan vawiin (27.10.2025) chhun khan an office-ah political session an nei a, thusawitu MNF Vice President Lalchhandama Ralte, Leader of Opposition chuan kan ram humhalh a, mipui thlavang hauhna atan hreh tak chunga total bandh kaltlangpui a ngaih thu a sawi.

Lalchhandama Ralte chuan kan hnam pasalthaten kan ram leh hnam himna turin India Constitution ziah thatngaiin an nawrthlu thei tih sawiin, ‘Article 371G hnuaiah kan ram, kan hnam, sakhua kal zel himna tur sa lu an rawn hawn. Hei hi MNF tan a ni loa, kan ram leh hnam tan a ni. Theihtawpin kan chhuah chhunzawm zel dawn a ni,’ a ti.

Vawiinah chuan ZPM Sorkarin Central duh dan leh mipuite rawn loa FCAA 2023 a pawm avangin Article 371G hnuaia ram neitu kan nihna a sut buai avangin Mizo mipuite thlavang hauh total bandh an neih dawn tih sawiin MNF Vice President chuan, ‘FCAA 2023 hi kan hotute nen do tul kan ti a, sut leh a nih theihna turin September 3, 2025 khan Assembly Speaker hnenah special session kova ennawn leh turin kan lo thlen tawh,’ tiin hun eng emzaw chen an ngaihchan hnuah, kan ram leh hnam humhim turin Mizoram pum huap total bandh neih an tih tluk thu a sawi.

Lalchhandama Ralte chuan buh lu chuh laia total bandh siam thu inthlahrun awm thu sawiin, ‘Kan ram humhalh a, mipuite thlavang hauh a tulna avangin hreh tak chungin kan kaltlang a ngai a ni. Ram chhan turin Zoram mipuite thlawpna ka dil a ni. Rules leh guidelines an tih pawh FCAA an pass hnu khan thla hnih hnu October 16, 2025 khan Forest Minister-in min pe chauh a ni. A introduce dawn atangin a ruk thei ang berin an ti a, an pass-naah pawh khan remti kan tihpui reng reng lo,’ a ti.