I&CT Minister leh STPI DG INKAWM

Nimin (15.10.2025) khan Information & Communication Technology (I&CT) Minister Dr. Vanlalthlana leh Software Technology Parks of India (STPI) Director General Arvind Kumar te chu minister pisa-ah inkawmin, changtlung leh chak zawka Mizorama STPI din a nih theih dan tur chungchang an sawidun.

STPI Director General hi Ministry of Electronics and Information Technology Minister Ashwini Vaishnaw-a leh Mizoram Dr Vanlalthlana indawrna bawhzuia Mizorama rawn kal a ni.

Dr. Vanlalthlana chuan Mizoram ṭhalai zinga IT kaihhnawiha ngaihtuahna leh thiamna neite leh ei zawng duhten bul an ṭan theih nan STPI hi Mizoramin a mamawh tak a nih thu sawiin, ‘Chak taka hma lak a nih theih nan state sawrkar chuan theihtawp a chhuah dawn,’ a ti.

STPI chu Aizawl bakah Lungleia din a nih theih dan sawiin Dr. Vanlalthlana chuan, Aizawlah MZU, NIT, NIELIT leh computer application course zirlaite behchhana din a nih theih angin, Lungleiah pawh Mizoram Engineering College, Mizoram Polytechnic Lunglei leh computer application course zirlaite behchhana din theih a nih thu a sawi.

STPI Director General chuan ruahmanna lo siam turin ICT Minister chu a chah a, rang taka hma lak an inhuam thu a sawi a ni.