Aizawl District Police chuan thuchhuah siamin, tukin (2.11.2026) a Bawngkawn to Thuampui road a khawlaia tlangval insual buai chungchangah Bawngkawn Police Station-ten hma an la nghal a, “Hemi chungchang ah hian a vaiin mi 10 man niin, heng mite lakah hian criminal case vide Bawngkawn PS Case No. 398/26 Dt.02.11.2026 u/s 194 (2)/292/125 BNS ziah luh a ni. Court-ah thawn an ni ang,” an ti.
Hetianga khawlaia insual buai ching lakah hian a na thei ang bera action lak zel tum a nih thu tarlangin Aizawl District Police chuan, “Aizawl city huam chhungah hian police patrolling neih thin ani a, mahse police patrolling party awm remchan lohna hmunah hetiang thil thleng a awm a nih chuan a rang lamin 112 ERSS leh heng police station number a hnuaia tarlanah te hian information pe thin turin mipuite kan ngen a ni,” tiin phone number an tarlang.
Aizawl District Police chuan, “Kan thalaiten kan hriat atana pawimawh chu police-ah thubuai kan neih chuan dam chhung criminal antecedent kan nei dawn a, hei hi kan hmalam hun zel ah harsatna tam tak a thlen thei a ni. Hetianga intihbuaina hi thleng tawh lo se kan duh a, a thleng anih chuan na takin an chungah action lak a ni zel dawn,” an ti.
1.Aizawl PS-8794747291
2.Bawngkawn PS – 8794747292
3.Vaivakawn PS-8794747293/6909316441
4.Kulikawn PS-8794747294
5.Zonuam OP-8794747295
6.Sialsuk PS-6909316443/9366884087
7.Sairang PS – 6909316442
8.Darlawn PS-6909316446
9.Sakawrdai PS-6909316445
10.Seling OP-7005994956