Legal Metrology chuan an thupek chhuah bawhzuiin nimin (11.11.2026) aṭang khan Aizawlah iron rod hralh dan an edik ṭan.
Mizoram chhunga iron rod zawrhte a size a dik loh nasat avangin hei hian mimal leh sawrkar building sak naahte nasa takin nghawng ṭha lo a nei thei a, hetianga rod size te lo lut zel dan nan kawng chi khat atan Controller of Legal Metrology chuan a buk (by weightment) chauha hralh tur leh a bukna pawh Legal Metrology endiksa chauh hman phalna thupek a chhuah a ni. Huntiam October 2026 a ral tak avangin a endik hna hi Legal Metrology Enforcement chuan Aizawlah nimin aṭang khan an ṭan.
Mizoram chhunga rod zuar dawr zawng zawng hremna an pumpelh theih nan thu zawm turin an ngen. Hei bakah hian Assam aṭanga la luta, dawr kaltlang lova hralh pawh thil ti dik lo chu manchhuah an nih chuan hremna an pumpelh dawn loh thu department hotute chuan an sawi. Dan zawm vek turin rod zuarte an ngen bakah mipuite ṭawiawmna pawh an ngen nghal a ni.