Land Resources, Soil & Water Conservation (LRS&WC) Department huaihawtin ni 23.10.2026 (Zirtawpni) khan Lunglei Convention Centre-ah kuhva chin dan leh enkawl dan zir hona, “Training cum Seminar on Scientific Method of Cultivation of Arecanut and Pest Management” buatsaih a ni.
He hun hmanpuitu Lok Sabha MP Richard Vanlalhmangaiha chuan kuhva chingtute’n harsatna an tawh lian ber pakhat kuhva ro tawlh ruk chu Mizoram Sawrkar hotute’n an ngaih pawimawh avangin 99% vel tihtawp theih a ni ta tih sawiin, “A lawmawm hle. Kuhva chingtute pawhin an vanneihpuiin, a hlawkna pawh an hmu chho mek niin ka hria. Mizoram chuan sawrkar leh mipuite thawh hona avangin a ṭha zawngin India rama a ber nihna a hauh chho zel. Ziak leh chhiar thiam kim (fully literate) state, ei rukna do kawnga state zawng zawnga pakhatna, ruihhlo do kawnga pakhatna, chhenna tlak boruak thianghlim thua pakhatna leh tui thianghlim kawnga pahnihna kan ni hi hmasawnna lawmawm tak a ni,” a ti.
Kuhva chin kawngah thiamna leh zir chianna beh chhana hma lak a pawimawh thu leh hman laia hriat dan leh tih dan aṭanga hma sawn zel a pawimawh thu sawiin Lok Sabha MP chuan, “Thlai chin, enkawl leh deh ral kawngah hlawk zawka kalpui turin mi thiam zawkte rawn chungin, hma sawn zel tura insiam rem leh inzir peih a pawimawh. Sawrkarin kut hna thawktute hma ngaiin, ei leh bara intodelh turin theih tawpin hma a la,” tiin kut hnathawktute chu sawrkar hmalakna tiṭhuanawptu ni loa, sawrkar puitu ni tura ṭan rualpuiah a sawm.