Lunglei Municipal Council (LMC) Vice Chairman K Lalrinawma chuan vawiin (2.11.2026) tlai dar 3 khan LMC vice chairman atanga banna LMC Chairman Lalzuithanga hnenah a thehlut.
K Lalrinawma chuan an party-a an hotute nen thil an sawiho hnuah banna hi a thehluh thu sawiin, “Kan party chuan chanvo insemzai hi kan thupui a ni a, ka aiawhtu tur keimah aia tha zawk an awm. LMC vice chairman hna ka chelh chhunga Chairman leh thawktu dangte nen thawhhona tha tak kan neih vangin lawmawm ka ti,” tiin boruak tha tak hnuaiah LMC vice chairman atanga banna thehlut a nih thu a sawi.
K Lalrinawma tawiawmtu ZPM Southern Hqrs President Lalramliana Papuia, MLA chuan tunhnaiah an party an insingsak thu sawiin, “Kan hotuten party lamah kan insawh ngheh phawt an ngaipawimawh hmasa a ni. Chutiang a nih avang chuan kan hotute zing a mi K.Lalrinawma pawh party-ah mawhphurhna pawimawh tak nei se an duh a, amah pawhin an beisei ang taka thahnemngai zawka party-a thawh a duh avangin nihna a chelhte pawh insingsak tha a tih avangin hetiang thil hi a ti a ni. Kan hotute duhdan pawh a ni,” a ti.
Tun hnaia ZPM Southern Hqrs hruaitu thar an ruatah K Lalrinawma hi treasurer atana ruat a ni.