Vawiin (22.10.2026) hian AH & Vety Minister C.Lalsawivunga chuan Thenzawla Mega Egg Project hnathawh mek leh AH & Vety Department-in ranchaw chinna hmun a neih Dilpui leh ranchaw chinna hmun zauhna tur kawng leidawh hna kal mekte a tlawh.
AH & Vety Minister chuan, “A tlangpuiin Mizoram chhunga artui tharchhuah hi kum khatah nuai 397 vel a ni a, mi pakhat tan kum khatah artui 29 chauh a daih tihna a ni. Vairengte kaltlangin nitin artui 70,000 vel ram chhungah kan lalut a, heng atanga artuia kan senral hi kum khatah cheng vbc. 16 chuang a ni. Chuvangin, Mizoram chhungah artui tam zawk thar chhuah kan mamawh a, a hralhna market-ah harsatna a awm lohzia a lang. Tuna Mega Egg Project kalpui mek hi kan tihlawhtling thei a nih chuan kan state mamawh tam tak kan phuhru thei dawn a, artui thar leh hrisel zawk mipuiten kan ei thei dawn bawk a, hna pawh kalpui chhoh mek niin 55% zawh a ni tawh. He farm hi a nihna ang taka kan kalpui thei a nih chuan ni khatah artui 70,000 atanga 89,000 vel tharchhuah theih kan beisei a, kan ram economy dinhmun pawh a tidanglam pha hial ang,. Mega Egg Project bakah hian Ran chaw (Animal Feed Plant) atan cheng vbc. 10 kan dah a, ran chawa intodelh kan mamawh. Mizoram hmun laili, Peace City dinna tur Thenzawlah tunah hian ran chaw chinna hmun thar tur kan ruahman leh mek a ni,” ti.
Mizoram Sawrkar hnuaia AH & Vety Department chuan Serchhip District chhunga Vety Farm Complex, Thenzawlah artui tharchhuah a farm lian din turin hma a la mek. He project atan hian NABARD RIDF-XXX hnuaiah cheng vbc 20.64 ruahman a ni a, ar tui tam chi (Poultry Layer) nuai khat vulh theihna tura duan a ni. He project-inna tum ber chu Mizoram chhungah artui thar leh hrisel zawk tam tak tharchhuah a ni a, State pawn atanga artui kan lakluh tihhniam a ni.