Vawiin (13.11.2026) chawhma dar 11:00 khan Mizoram Education Reforms Committee (MERC) thutkhawm vawi 18-na chu an Chairman Dr Vanlalthlana, Education Minister hovin Committee Room, Directorate of School Education, Treasury Square-ah an thu khawm.
He thuthkhawmah hian zirna chungchanga thil pawimawh tak tak leh hmasawnna tur an sawiho. Chungte chu :
(i)Sawrkar leh kohhrante thawhhona atanga school enkawl dan tur Public Private Partnership (PPP) rawtna tih hlawhtlin nan district tinah PPP mode school pakhat tal pilot project a kalpui turin school thlan ni se an ti.
(ii)Draft Mizoram Education Service (MEdS) Rules, 2026 chu siam rem ngaite siam remin School Education leh Higher & Technical Education ten service hrang nei se, hun remchang hmasa berah concerned service association-te thlirpui nise, an ti.
(iii)Transfer and Posting of School Teachers Rules, 2026 pawh hman theih tura ruahman a ni ta. Hun rei lo teah zirtirtu insawn dilte pawh sawrkarin kaihhruaina thar a siam leh he dan thar hnuaiah hian ngaihtuah a ni dawn a ni.
(iv)Mizoram zirna lama hmasawn zel nan Central Board of Secondary Education (CBSE) syllabus zawm tura CBSE Affiliation dil turin school then khat ngen ni se. Hemi avanga senso ngai awm chu sawrkarin tum sak dan ngaihtuah se an ti.