Methamphetamine neitua puh an man

Champhai Police-te chuan June 26, 2025-a methamphetamine thahnem tak neitua puh chu, hun eng emaw chen a tlanbo hnuah October 28, 2025 (Thawhlehni) khan man a ni.

Champhai Police-te chuan June 26, 2025 khan Chhungte khaw hnuaiah methamphetamine mun 101,000 (kgs.5.600), cheng nuai 72.8 hu a chhut Ignis Car atangin an man a ni. Police-te’n a hmun an thlen hmain methamphetamine neitua puh hi a lo tlanbo hman.

Champhai Police Station ah thubuai ziahluh niin chhuizui char char a ni a, an chhuizuina atangin ruihhlo neitua puh Khupthanthawna (21) s/o Zamsuanlianpauva (L), Ngur khua nia insawi chu Bulfek, Myanmar-ah a tlanbo tih hriatchhuah a ni.

A awmna chin hriat zel tumin Champhai Police-te chuan an chhuizui zel a, Bulfekah hian a tawmbo tlat avangin man theih a ni lo. Hun rei tak an veh hnuah a awmna hmun atang hian India ram state dangah tlanbo a tum nia hriat leh niin CID(SB) te puihnain a awmna chin an hre thei ta a ni.

Champhai Police-te chuan Khupthanthawna hi Falkland, Aizawla guest house pakhatah a thleng tih chhuichhuakin, Bawngkawn Police te an pun a ni. Bawngkawn Police-te hian Thawhlehni tlai nimin tlai khan a thlenna hmun atang hian Khupthanthawna hi man ta a ni.

Champhai Police-te chuan Thawhlehni zan khan Bawngkawn Police Station atanga lain, nimun-khan Champhai rawn thlenpui. Court ah hruai nghal a ni a, thuzawh belh tur an la neih avangin Champhai Police te chuan darkar 48 chhung kawl belh turin court l-ah dilna an thlen nghal a ni.