MLA-in YMA Inkhawmpui Lian souvenir a tlangzarh

Nizan (21.10.2025) khan Sakawrdaia YMA Inkhawmpui Lian vawi 75-naah ‘Palai Lawm Zan’ hman a ni a, Bialtu Lalchhandama Ralte chuan souvenir a tlangzarh a, Mizoram hi chhe viau tawh leh kan thalaite pawh chhe ta viau anga sawi tawk an awm thin pawi a tih thu a sawi.

Ram chhan ngam thalai an tam tih sawiin Lalchhandama Ralte chuan, “Platform thenkhatah kan ram a chhe vek tawh, kan thalaite pawh an chhe tawh tia zirtirna him lo leh thalaite tibeidawng thei tura thusawi an awm fo thin. Mahsela, zaninah heti zat thalai rual ram leh hnam tana ding ngam kan la awm hi a ropuiin a lawmawm tak zet a ni. Thalaite tlemte kawng dik lo zawhte avanga kan chhe ta vek anga sawi hi a him lo a ni,” a ti.

Bialtu MLA chuan rambuai avangin hmar tlang dungah hun rei tak chhung YMA a ding thei lo tih sawiin, ‘Development pawh a lut ngai lo. Hmar thimpui tih tawngkamte pawh kan hre thin. Remna leh muanna awm hnuah hmasawnna a lo lut zela Sakawrdai khawpuiah ngei YMA Inkhawmpui Lian kan han thleng ta mai hian hnuk a tiulh thei a ni,” tiin kan ramah leh hmar tlang dungah hmasawnna a lo luh zel dawn thu a sawi.

Mizoram mipa population kiam chak lutuk chu buaipui tham a nih thu sawiin Lalchhandama Ralte chuan, “Kumina Economics & Statistics Dept-in data/statistic chi thum a tihchhuah kan zirchian chuan kum khat chhunga mitthi za zela 35 chu hmeichhia an nih laiin, mipa chu 65 an ni. Kum 10 chhunga nau piang 51% mipa leh hmeichhia 49% an ni. Mitthi zinga 42% chu thalai kum 15-54 inkar an ni a. Heng thalai thi kan sawite zinga 75% zet chu mipa an ni.” a ti.