Vawiin (October 22, 2026) hian Mizoram hmun hrang hrangah MNF din champha vawi 65-na lawm a ni a, a lawmna pui ber Aizawla MNF office-a buatsaihah MNF President Zoramthanga chuan thu sawiin ram chhung leh pawna MNF member zawng zawng chibai a buk a, “MNF chu mihring ngaiha mi tlawm tak takte din leh bul ṭan ni mah se, kan hotu hmasaten Pathian hming lam chunga Mizo Hnam thuthlung chi an lo tuh chu thi loin a ṭhang duang zel. A ral ve lo a, a tlu ve hek lo. Tling lo tak chung pawha ‘Pathian leh kan ram tan’ kan tih tlatna hi Pathianin mal a sawm a. Mizorama political party lian ber leh nghet ber a la ni ta zel a ni,” a ti.
Zoramthanga chuan, “Mizoramah hian political party leh movement lian tak tak an lo dingin an lo chhuak tawh ṭhin a ni. Wave na tak nen an hun lai chuan an thawm pawh a na ṭhin hle. MNF pawh phehthluk tumin an su na thei hle. Amaherawhchu MNF innghahna thuthlung hmuh ṭhelha MNF an do-na kha an tihsual lai a ni ṭhin. An do kha Laldenga leh a hote an ni lo a, MNF an ni hek lo. An do an hre lo a. ‘Pathian leh kan ram tan’ tih thupuia neitu MNF innghahna kan Pathianin he ram leh hnam enkawl tura hriak a thih party hi na taka pheh thluk tum ṭhin mah sela, Pathian vekin a hun takah a tungding leh ṭhin,” tiin innghahna nghet nei lo chu an tlusawp leh thuai a, an ral leh mai ṭhin thu a sawi.
MNF President chuan state sorkarna siam mektute chungchang pawh tarlangin, “Tun hunah pawh kan ram kaihruai tura mipui enchhin mek ZPM Sorkar chu movement wave na tak nen bul rawn ṭanin Mizoram min han kaihruai ta a ni. ‘Pui’ hrang hrang nei awmkhawm, hram dan pawh chi hrang hrang nei an nih avangin an lungrual hleithei lo a, an chet dan pawh a hmuhnawm ṭan viau a ni. MNF erawh chu hram dan inang, Pathian leh kan ram tan titu, thuthlung khat inang vuantu kan ni a. Kan innghahna lungphum kan Pathian hi a rinawm a ni. Thinlunga amah kan vawn tlatna hi Lalpan tlingah min pawmsak. Beihna nasa tak leh nekbehna karah pawh min tungding leh ṭhin. Kan chakna thuruk pawh a ni,” a ti.