Vawiin (2.11.2026) chhun khan Mizo National Front (MNF) chuan an office-ah chhung inkhawm an hmang a, MNF NCC Member Robert Romawia Royte, MLA in thu a sawi.
Roberta Romawi chuan Bible-in dawt sawi a haw em em a, dawt sawitu chu ramhuai sual (devil) tiin a sawi hial thu sawiin, “Kan Chief Minister zahawm takin Assembly Session chhung leh pawna dawt a sawi fo hi a pawi. Keini MNF chuan thudik hmangin dawt hi kan hneh tur a ni. MNF-te chuan sim ngai leh insiamthat ngaihna laia insiam thain, Mizoram chhunga mite leh state pawna hnamfangte thlengin sorkar leh mai tura min beiseina hi tihlawhtling ang u,” a ti.
MNF movement khan rahṭha tam tak a chhuah thu sawiin, “India Danpui hnuaia Mizo hnam leh sakhaw humhimna bakah ram neitu nihna leh ram chunga thuneihna thlengin Mizo mipuite kutah a awm. Hetiang danpui hnuaia thuneihna hi Nagaland state tih loh chuan India ram state dangin an neilo a ni,” tiin India Danpui Article 371G hnuaia inhimna hrang hrangte bakah Inremna Thuthlung a ILP tihnghehna te, MZU leh High Court bakah state puitlinga Mizoram hlankaite pawh MNF movement rahchhuah vek a nih thu a sawi.