MPCC Spokesperson Dr. Lallianchhunga chuan vawiin (19.10.2026) hian Aizawl Press Club-ah press conference neiin, ZPM Sorkarin kum 2 dawn MUHCS a kalpui chhung hian a chhawrtu damlote hmaizah vangin a pawng atakin Congress Party chuan an sawisel duh ngai loh thu a sawi.
Dr. Lallianchhunga chuan healthcare hi mipui pawisa thawhkhawma kalpui a nih avangin a hmang tur zawng zawng chuan hmang thei vek se tih chu Congress Party duhdan a nih thu sawiin, “ZPM Sorkarin MUHCS a inziahluhna man pawh hi mi harsate ban phak tawkin tihniam ngei rawh se, tih hi Congress Party-in kan la phut reng. Tun hnaia MUHCS chungchanga sorkar leh Synod Hospital inremna bik chungchang lo lar leh hluai pawh hi Congress Party chuan uluk takin kan zir chiang a, MUHCS hnuaia damlo an enkawlna rate tur atana inremna an siam danah Synod Hospital meuh pawhin demna a tawk lek lek mai hi fel lo kan ti hle. Hei hi a chhan chu MUHCS chungchanga rorelna dik a awm loh vang niah Congress Party chuan a ngai a ni. Synod Hospital chu kohhran enkawl a nih avangin langtlang takin thil tih a duh ang tih kan ring a, mahse ZPM Sorkarin confidentiality clause a siam avangin langtlang takin thil an ti thei lo ni mai zawkah kan ngai a ni. Tin, Synod Hospital, Durtlang tana MUHCS hnuaia rate an bithliah hi sawisel chiah kan ngai lo. Mizoram chhunga hospital tha tana pawm theih rate pangngai State Sorkarin a bithliah sak hi damlo leh an chhungte tan mai bakah kan ram economy hmasawn nana tha a nih avangin kan lawmpui hle a ni,” a ti.
MUHCS sum hi Health Minister pawisa a ni lo va, mipui pawisa a ni a, vaibelchhe eng emaw zat chu sorkar hnathawk leh pensioner te an hlawh atqnga pek luih tir an nih thu sawiin MPCC Spokesperson chuan, “MUHCS a inziak lut te’n inziah luh man (registration fee) sang tak an chawi bawk a ni. MUHCS sum hman dan zawng zawng pawh hi langtlang taka kalpui tur niin kan ngai. Mizoram pawn pvt hospital-te awlsam tak leh rate tha taka MUHCS hnuaiah inremna (agreement) ZPM Sorkarin a ziahpui theih laiin, kan ram ngeia pvt hospital tha tak tak te nena inremna kawng zawng lo a, Pharoa thinlung khauh tak ang Health Minister-in a la pu tlat hi hriatthiam harsa kan ti. MUHCS a inziak lut si, Mizoram chhung MUHCS empanelled hospital-a khum chang lo tam tak pvt hospital-a enkawl ngai damlo eng emaw zat an awm reng,” tiin heng damlote tan hian rorelna dik an phut tlat thu a sawi.
Mizoram chhunga MUHCS la zawm ve lo te hi pvt hospital 9 chauh an ni tawh tih sawiin Dr. Lallianchhubga chuan, “Mipuite mamawh dan enin an grade mila MUHCS zawm ve an hreh loh thu sorkarah an thlen tawh chungin, ZPM Sorkarin chhuanlam siama tihkhawtlai ngar ngar tum a ang hle. Pvt hospital thenkhatte’n an zawm theih loh tura MUHCS kalpui luih tlat hi healthcare system tha a ni thei lo niin kan ngai. Minister in ‘pawl kan dawr tawh dawn lo, damdawiin mal zelin kan dawr tawh dawn’ a tih hi Mizoram pawna damdawi inte a mal te te a dawr a, rate sang tak tak an pawmpui dungzuia kal pui a tum hi eirukna kawngkhar inhawn theihna niin kan hria. Pawl ang chuan engkim member-ten langtlang taka an inhriatpui tawn theih laiin, damdawiin mal ang chuan inremna mantang/puan-hnuai thil inpek ruk theihna remchang tak a awm thei dawn niin kan hria. Pharoa thinlung ang maia a thinlung tikhauh lo turin Health Minister kan beisei a ni,” a ti.