Kan hma lawka hunpui lo thleng tur thlirin Mizoram Sawrkarin ruihlo tawlhrukna leh ruihhlo hmansualna hluar zel do letna atan November 1, 2026 atanga kalpui tan tur ruihhlo do beihpui thlakna. Operation Jericho 2 chu vawiin (October 31, 2026) hian hawn a ni.
Operation Jericho hawnna hun hi vMultipurpose Hall, PHQ-ah neih niin, DGP Sharad Agarwal a hawng. He beihpui Operation Jericho thawhhnihna hi ruihlo do kawnga dan kengkawhtute hmalakna tichak zual tur te, ruihlo tawlh rukna dang chat tur leh state chhunga ruihhlo hmanga sumdawnna te thiat darh tura ruahman a ni.
Operation Jericho hi September 1, 2025 khan Mizoram Police, Excise & Narcotics Department leh Central Young Mizo Association (CYMA) te thawhhonain neih tan a lo ni tawh. A tum ber chu ruihhlo tawlhrutute leh ruihhlo hmanga sumdawngte chhui chhuah leh man chhuah kawnga ngawrh leh zuala beih a ni.
He hmalakna hnuaiah hian Champhai district chhunga Myanmar ramri hrula awm khaw 22-ah Police dah an ni. Police-te hian District Police, tualchhung tlawmngai pawl hrang hrang, Village Defence Party (VDP), leh tualchhung YMA branch-te thawhpuiin ruihlo tawlhruk titawp turin thahnemngai takin hna an thawk a ni.
He hmalakna hian rah tha tak a chhuah zuiin, khaw 22-a police dah bikte lakchhuah an nih, March 31, 2026 thleng khan ruihlo cheng vbc ₹391.95 hu man a ni. Hemi chhung hian case 203 ziak lutin mi 298 man an ni. Police dahte lakchhuah an nih hnu pawhin, an awmna District SP-te kaihhruaina hnuaiah ruihlo tawlhruk beihna hi chhunzawm zel a ni.
Hunpui a lo hnaih leh tak avangin Mizoram Sawrkar chuan ruihlo dona kawngah nasa lehzuala beihpui thlak thar leh tul a ti a, November 1, 2026 atang hian 1st Bn. MAP, 3rd Bn. MAP, 1st IR Bn. leh 5th IR Bn. te tir chhuakin Operation Jericho 2 a kalpui tan dawn.
He beihpuiah hian District SP theuhte kaihhruaina hnuaiah tualchhung tlawmngai pawlte leh a kaihhnawih pawl hrang hrangte nen thawk hovin district hrang hrangah kalpui a ni ang. Ramri hrula district-te chu ruihlo lak luh, tawlhruk, leh ram chhung hmun danga thawn kual tur venna kawngah an pawimawh avangin ngaihpawimawh bik an ni ang.
Intelligence hman tangkai te, agency hrang hrang thawhhona tihchak lehzual te, ramri venhimna te leh mipuite nena ruihhlo dona kawnga thawhhona tha lehzual neih te chu he beihpui hlawhtlinna atana lungphum pawimawh leh ngaihpawimawh a ni dawn.