Nimin (26.10.2026) khan Champhai Police chuan ruihhlo hmun hrang hrang atanga an mante chu District Hospital Complex-ah an hal ral a, IGP (ANTF) Seju P Kuruvilla chuan a hmanpui.
Seju P Kuruvilla chuan Champhai District chu border district a ni a, India rama ruihhlo lut tam zawk chu Zokhawthar leh Champhai kaltlanga rawn lut a nih avangin Champhai Police-te chuan ruihhlo dona kawngah mawhphurhna pawimawh tak an nei tih a sawi a, “Ruihhlo tawlhruk dan chah mai ni loin, a cartel lian zawkte ram chhung leh ram pawn inkungkaihna neite chu mobile phone leh bank account kaltlanga chhui chian zel an ni. Bank thuneitute nen thawhhona tha tak neih a pawimawh. Ruihhlo dona chak zawka a kal theih nan Sawrkar Laipui leh State Sawrkar hnenah thawktute mamawh thlen chhoh zel a ni,” a ti.
Ruihhlo halral takte hi Champhai Police-te’n hmun hrang hranga an man, District Court-in halral tura phalna a pek tawhte a ni. September, 2025 atanga February, 2026 inkara hmun hrang hranga an man khawm niin, heroin kgs 4.350 (A hlut zawng Rs. 8,70,00,000/-) leh methamphetamine kgs. 9.391 (A hlut zawng Rs. 7,51,28,000/-) a ni. heng kaihhnawihah hian ND&PS Act hnuaiah case 23 ziahluh a ni.