Oct 30, 2025
Thursday
Aizawl Wildlife Division chuan vawiin (30.10.2025) hian thuchhuah siamin, dan loa exotic bird (Pesquet’s Parrot) tawlh ruk man, Aizawl Zoological Park-a February 2024 a dah luh chu nimin zing dar 8:35-ah rukbo a ni tih hriat a nih thu an tarlang.
Aizawl Wildlife Division tarlan danin, Pesquet’s Parrot rukbo hun hi ni 28.10.2025 tlai lam dar 4:00 atanga nimin zing lam dar 7:00 inkar nia hriat a ni.
He thil thleng chungchangah hian Sairang Police Station-ah FIR thehluh a ni a, information tangkai thei tur nia hriat dangte khawn khawma thehluh belh mek zel a ni. Tin, Wildlife Crime Control Bureau (WCCB), Kolkata hnenah pawh hriattir nghal niin, anni pawhin theihtawp chhuahin hma an la nghal.
He thil thleng chungchangah hian thawktute inhnamhnawihna awm thei a nih avangin a theih dan danin department chhungah inchhui zui mek a ni. Hetiang thil sahuana a thlen tawpna a nih ngei theih nan theihtawp chhuah mek a ni a, theihtawp chhuah chhunzawm zel a ni ang. He thil thleng avang hian Aizawl Sahuan staff-te chu duty hun insiamin, a inchhawka tlaivarin an duty nghal.
He case hi theihtawp chhuaha bawhzui zel a ni a, a chhui zuina atana tangkai thei tur information min pe thei an awm a nih chuan ‘The Mizoram Rewards for Detection of Forest and Wildlife Offence Scheme 2019’ in a phal angin lawmman Rs. 20,000/- pek an ni dawn. An nihna (identity) thupsak tlat an ni ang. Information pek theihnate mobile phone number – 8974436843 / 8414012905 / 9862347339 / 8014343542 (with Whatsapp)
