Tan lak a ngai &#8211; Education Minister

Education Minister Dr. Vanlalthlana chuan nimin (19.11.2025) khan SCERT Courtyard-ah State Council of Educational Research & Training (SCERT) buatsaih, ni hnih awh tur, EduTech Fest & Career Fair 2025 a hawng.

Dr. Vanlalthlana chuan technology kan hman tangkai thiam chuan ram pumin hma a sawn dawn tih sawiin, “Artificial Intelligence leh technology hmang thiam chu an dinchan dawn avangin hemi mila zirna her rem a, mahni intuaihriam a ngai. Kan literacy rate sang mah se thiamnain a um zui loh chuan awmzia a awm loh thu sawiin, PARAKH (Performance Assessment, Review, and Analysis of Knowledge for Holistic Development) exam-ah Mizo zirlaite’n state danga an zir rualpuite an tluk loh hle avangin tan lak a ngai,’ a ti.

World Economic Forum chhut dan chuan kum 2030-ah AI chuan khawvel pumah hna maktaduai 85 a luahlan ang a, hna thar maktaduai 97 vel a siam dawn tih sawiin Education Minister chuan, zirlai kalkhawmte chu AI nen hna an inchuh dawn avangin, tunlai mil thiamna – digital literacy, communication skills, financial literacy, leh tourism thang zel dawnsawn nan social skills leh hospitality – lam bawh zel turin a fuih.