MPYCC chuan thuchhuah siamin, Higher & Technical Education (H&TE) Minister Dr. Vanlalthlana’n ni 28.10.2026 (Nilaini)-a a office ah chanchinbumite a kawmnaah Mizoram State University (MzSU) a building pawh laawm hma hauh a group D staff bik hmanhmawh taka a lak chungchang a sawifiahna an lo hmuh thu tarlangin, “Dr. Vanlalthlana’n ‘college zirtirtute zingah thawk tha leh tha lo tehna (faculty assesment) kalpui a nih dawn’ tih a sawi chu thil zahthlak takah kan ngai. College zirtirtu thawk tha lo a teh dawn a nih chuan amah inenfiah hmasa ber tur leh tha takin a thawhna Pachhunga University College-ah class la tawh turin kan phut.
Social Media lamah ZPM Marini’n Facebook Lawrkhawm Group-ah ‘Dr. Mathlana hnalak dan chungchanga DEO pakhat thusawi, tia post siamin, Aizawla veng pakhat DEO-in Dr. Mathlana chungchang a sawi “Govt. Mizo Higher School-a Botany Casual Teacher an lak tuma Dr. Vanlalthlana laina hnai tak, an in atanga pasal nei fanu hi 4-na a ni a, an chhungte a nih thu min hrilhtu an awm avang leh an mark a inhnaih avangin 1na zawk aia dah kan tum” tih a sawi hi thil rapthlak tak a ni tih tarlangin MPYCC chuan, hetianga thil dik lo, midang chanvo chhuhsak pawisa lo DEO hi zawng chhuaka hremna pe turin an phut.