Thu belhchian dawl lo a ni &#8211; GAD

GAD chuan thuchhuah siamin, tun hnaiah Assam Rifles Biak In hmun sawrkarin kohhran chhuhsak a tuma puhna media-ah a lo lang tih tarlangin, ‘Hei hi thu belhchian dawl lo a ni,’ an ti a, Assam Rifle Biak In sawrkara hlan tura Synod ngen a nih chhan an sawifiah.

GAD tarlante :

Kum 2002 daih tawhah khan, khatih laia sawrkar khan Assam Rifles ram chhuahsan a nih hnua a hman dan tur – The Mizoram (Restriction on Use of Transferred Land) Act, 2002 chu a lo pass tawh. AR-te’n an ram an lo chhuahsan tak avangin he dan, section 6-na hnuaiah, AR chhuahsan ram hman dan reltu tur Advisory Committee chu sawrkarin a din ta a ni.
Sawrkar chuan ama thua thuthlukna siam mai chu tha a tih loh avangin, mipui huap kim thei ang ber turin he Advisory Committee hi a din. Recognized political party zawng zawng aiawhte, NGO hrang hrang sawmlehpakhat aiawhte leh department hrang hrang aiawhte telin, Chief Minister chu Chairman a ni. He committee hi thuneitu sang ber leh thutawp siamtu a ni.
Ni 19.05.2025-a Advisory Committee meeting chuan, AR chhuahsan ram chhunga pass nei zawng zawngte chu vantlang tana an ram thehchhuak tura ngen ni se, a ti. Mi engemaw zatin phal takin an ramte chu an rawn hlan tawh nghe nghe a ni.
AR Biak In hmun pawh vantlang tana rawn hlan turin Mizoram Presbyterian Church chu ngen ve ni se tih a ni. Synod hotute dawr turin Advisory Committee aiawh mi 3 ruat nghal an ni. Advisory Committee-in ngenna a siam chhan chu hengte hi a ni:-

i) Section 5 of the Mizoram (Restriction on Use of Transferred Land) Act, 2002 in AR chhuahsan ram chu vantlang tan chauha hman a phal avang leh mimal emaw, pawl emaw tumah pek a phal loh avangin.

ii) Assam Gazette Notification dated 08.08.1952 ah biak in hmun hi AR ram chhunga rin luh a nih avangin.

iii) Mizoram Sawrkar leh AR-te ram inhlanna MoU-ah biak in hmun hi AR-in Mizoram Sawrkar kuta a hlan tel avangin.

iv) Mizoram Gorkha Mandir Sanchalan Samiti, Bazar Area-ten Prime Minister hnenah Assam Rifles Hari Mandir chu neih zui an dil avangin, biak in hmun kohhran hnena pek a nih chuan an tan tanfung tha tak a nih theih dawn avangin.

Advisory Committee aiawhte chuan ni 30.05.2025 ah Kohhran hruaitute chu an dawr. Ni 02.07.2025- ah Mizoram Presbyterian Church chuan rem an tih loh thu dawn a ni.
Ni 24.07.2025-a Advisory Committee meeting-ah Central YMA-te’n PIL WP(C) No 31 of 2020 thubuai Court-a an thehluh zingah Biak In hmun pawh a tel thu dawn a ni. A tu ve ve tan pawh court thu lo nghah rih phawt mai loh chu tih theih a awm lo nia ngaih a ni. Court thu nghah phawt mai a tul thu chu ni 01.09.2025 ah ziakin Kohhran hruaitute hriattir an ni.
Ni 23.10.2025 ah Mizoram Presbyterian Church chuan biak in hmun chu thubuai zinga a tel loh thu Sawrkarah ziakin an thlen leh. Hemi hnu hian Advisory Committee hian meeting a la nei leh rih lo. Meeting leh huna agenda atan dah a ni. Chuvangin thuthlukna siam a la ni lo.

8 Advisory Committee hi NGO leh political party hrang hrang aiawhte pawh an telve vekna a nih avangin, he thil hi politics inbeih nana hmang lo turin GAD chuan mitinte a ngen a ni.