Vawiin (28.10.2026) hian Vanapa Hall-ah Chief Minister Lalduhoma hoin Vigilange Awareness Week 2026 hman a ni. Chief Minister hian sorkar hnathawkte chu eirukna laka fihlim tur leh ram mipuite chu eirukna leh hlemhletna do kawnga thawhpuiah a sawm a, “Kalphung tha zawk nen eirukna kan do mek a ni,” a ti.
CM thusawi dangte :
Eiruk theihna laite siam tha a, a pawp laite thawm tha turin hma kan la nasa a. Aikal lak kan titawp a, sorkar hnathawkten hun a vawn dik theih nan bio-metric attendance system kan siam a ni. CBI hnenah general consent kan pe. Contrat agreement fel lo, sorkar chan chhe sa ran ang chi reng reng a awm kan phal tawh lo. Project kan centralise-a, project inthuah te, project hman zui tlak loh tur thawh fo ang chi kha kan remti tawh lo. Right to Public Services Act hnuaia service kan tipung. Official-te biak that kher a ngai tawh lo.
Hun tiam neiin hna an thawk tawh zawk a ni. Mipuite an zualko zung zungna tur online “Mipui Aw” kan nei bawk a. Zualkona lo lut kan chinfel nghal theih chi reng reng chu kan ching fel nghal zel.
Project Monitoring Committee kan din a, mipui aiawhzo takin member tur pawh kan thlang a, kal dik lo thei lo turin kan siam a ni. Mizoram mipuiten khawiah pawh hna chhia in hmuh chuan rawn report zel ang che u.
Lok Ayukta kan tichak a, ACB kan thuam tha a. Integrity Pact kan uar thar a, contract hna petu leh a diltute chu unau emaw inlaichinna nei an nih kan remti tawh lo.
Financial Advisory System thar kan duang a, financial sanction hmu tura finance department pan zel ngai tawh lovin Department tina Secretary ten an financial power milin sanction an pe thei ta. Hman ni lawkah One Department One Bank system kan kalpui leh a. Department-te sum che vel awlsam taka endiksak zung zungna tur a ni.
Mizoram Integrated Works Account System kan siam thar leh bawk a, works department lian zualah bul kan tan a. Cheque System tihbona tur a ni.
Advertisement tel lo va sorkar hna lak a awm lo a, qualify lo tumah lak an awm tawh lo. Buhfai buk a lo dik ta hle a, doctor zinga dik lo va Non-Practising Allowance la kan zawng chhuak a, dan lo va family pension late chu mahni duh thua in-surrendar turin kan ti a. Mi tam tak an rawn in-surrendar-a, sorkar sum tam tak kan hum phah a. Lirthei chhiah pe lote lakah pawh hetianga hmalak hi kan rilruk leh mek a ni.
Tawngka ringawtin corruption hi kan do lo a, kalphung thar duang chhuakin a tak takin kan do mek. A do rem turin kan zaa kan tanrual a ngai thung a, ram mipuite chu eirukna do kawnga tangrual turin ka sawm che u a ni.
Kan dan kengkawhtute an chak tak avangin tunah hian India rama conviction rate sanna ber pawl kan ni a. Kan khawpui chu hmeichhia leh naupangte tan a him hle a, kan nunphung a mawi avangin kan hmingtha hle a, khualzin pawh an pung nasa a ni.
Corruption-ah ber kan fihlim chuan kan ram hian hma a sawnpui dawn tih a chiang a. Kan officer-te pawh lo fihlim ngei ang che u. Mipuite pawhin eirukna hnawl ngam ila, kan nu leh pa, kan unauten dik lo taka sum an lakluh hmanga an lei thuamhnaw leh bungruate hi i duh lo ngam ang u.