Vawiin (6.11.2026) chhun khan SAD Conference Hall ah Tourism Minister Lalnghinglova Hmar hoin Winter Festival 2026 Working Committee an thukhawm a, Winter Festival 2026 atana ruahmanna leh sorkar department hrang hrangte chanpual leh hmalaknate sawiho a ni.
Tourism Minister chuan Winter Festival chu tualchhung mite leh khualzinte tan a hun hlimawm a nih theih nan lungrual taka mawhphurtu sorkar department-te thawhhopuiah a sawm a, “State pawn mi an lo kalin kan nun phung leh kan tihdan te a inan vekloh avangin inhriatthiam tawnna leh inzah tawnna kan neih tlan pawimawh,” tiin hemi kawngah hian tualchhung mite leh khualzin mite hnenah ‘responsible tourism’ chungchanga inhrilhhriatna tha neih a tul thu a sawi.
Kumin Winter Festival hi a lawmna pui ber chu Aizawl Lammual ah ni 8 chhung – December 16-23, 2026 a neih tura tinzawn a ni. Tlaizawng Paradise – Phuaibuang, Sakawrhmuituai Sunset, Chepa Nun- Darzo leh event dangte he festival pual hian an ruahman tel.