YMA Inkhawmpui Lian CM-in a hmanpui

Nizan (22.10.2025) khan Young Mizo Association (YMA)Inkhawmpui lian vawi 75-na, zan hnihna Vantlang Inkhawm chu Chengkawlawn Run, Sakawrdaiah neih a ni a, Chief Minister Lalduhoma chuan khuallian niin a hmanpui.

Chief Minister chuan, inkhawmpui palaite chibai a buk a, chawimawina dawngtu zawng zawngte a lawmpui thu sawiin, ‘YMA chu a awmna hmun apianga mipuite thlamuantu a nih avangin mitin tana pawl tangkai a ni. Ramria kan buaiin YMA in lo lang a, khuarel chhiatna kan tawhin YMA hmel kan hmu. Zofate insuihkhawmna kawngah ni se in tangkai reng thin,’ a ti.

YMA member-te chu eirukna dopuiah sawmin Lalduhoma chuan, mahni chhungkuaa bul tanin, eirukna suma lei thilte lo duh lo ngam turin a ngen.

CM thusawi dangte :

Zofate huikhawmna kawngah hian sorkar pawhin hma kan la nasa a, Mizo Diaspora Cell kan din a, Mizo DiasporaHub portal kan siam bawk a. Tun hnai lawkah pawh Singapore-a hnathawka awmte harsatna chu kan bawhzuisak a ni.
Hnam zia leh tihdan vawnhim kawngah YMA ten in thawhhlawk thin a. In hmalakna tichak turin sorkar chuan Thingsulthliaha YMA rama Centre sakna tur Rs. 100 Cr. kan ruahman a ni.

YMA leh sorkar thawhhona Ruihhlo do Task Force kan tinung thar a, Hulhhliap Short Stay Centre kan kalpui dun a, Operation Jericho kan kalpuiho mek bawk. Sorkar leh YMA,-te thawhhona dang tam tak sawi tur a awm.

Security Coordination Committee thutkhawm hnuhnung ber report-a a lan danin kan ramah rukruk case a sang fal hle . Thingfak leh suka kawngkhar do mai mai thin hnam kan nih thin kha hriain, eiruk leh rukrukna lam chi hi chu i do tlat ang u.
Internet khawvelah kan tawngkam kan duh tui lo thin a, kan milar leh Artist te kan sawi zui duh dante a mawi lo thin hle. Hnam dangte pawhin hei hi min hriatpui a ni. Tumah mi fel famkim kan awm loh avangin chin tawk i nei thiam ang u.