Youtuber-te hi media liante thik tham an ni tawh

Vawiin (October 22, 2025) hian Mizo Youtuber Association chuan general assembly vawi 2-na, Julie’s Getaway, Tanhril-ah hmangin, Dr. Lalmalsawma Nghaka, D3 Business chuan khuallian niin a hmanpui.

Dr. Lalmalsawma Nghaka chuan, tunhma khan kan pi leh pute nunah khawtlang mipuite information pekna atan tlangau kan nei tih sawiin, ‘Khawtlang mipuite hriat tur a rawn puang ṭhin. Chhiat tawhna chungchangah zualko kan nei. Khaw kar hla tak taka tlangval tlawmngaiten thu kengin zualkoin thu an keng ṭhin. Tunlai khawvelah erawh chuan, chawplehchilhin information kan dawng zung zung thei. Kan ramin dikna a kalpui tak tak theihna turin Youtuber tluka pawimawh hi a awm bik chuang lo. Dik tak leh rinawm taka kan zavaia kan ram tana kan thawhho hi a ngai a ni,’ a ti.

Dr. Lalmalsawma Nghaka chuan, India ramah ngei pawh Youtuber-te hi media liante thik tham leh el tham an ni der tawh tih sawiin, ‘Chu chu Mizoramah pawh a thleng mek. Chu chuan Youtube channel neitu ten mawhphurhna an neih len tawh zia leh, kan ram kawng dika hruai thei tu an nih zia a ti lang. Youtuber-te an pawimawhna em em pakhat chu politics thuthar thehdarhna kawngah a ni,’ tiin politics dik leh tlo kan neih a, thu dik a dingchang dawn a nih chuan Youtuber-te hian nasa takin mawhphurhna an neih thu a sawi.

Mizo Youtuber Association general sssembly hi Harry Khiangte, President chuan kaihruaiin C. Ramengmawia Chhangte, Secretary chuan report a pe.

Mizo Youtuber hi September 9, 2022 a din niin tunah hian member 102 an awm mek. ZL Dinpuia, Vice President chuan lawmthu sawiin 2026-2027 hruaitu thlan nghal a ni.

Kum 2026-2027 MYA hruaitu tharte:-

President – Harry Khiangte
Vice President – ZL Dinpuia
Secretary – C. Ramengmawia
Asst Secretary – Lianhnuna Renthlei
Treasurer – KC Zoherliana
Fin. Secretary – Zonunmawii