Feb 02, 2026
Monday
ZPM chuan vawiin (2.2.2026) chhun khan an office-ah chhung inkhawm an hmang a, thusawitu Agriculture Minister PC Vanlalruata chuan ZPM-in Pathian kaihhruaina an chan zel thu leh kum 2026-2027 budget-ah thlai thar leina tur an dan tawh dawn thu a sawi.
PC Vanlalruata chuan central-ah budget thar an puang a, Mizoramin kan sum hmuh a pung dawn tih kan hre ta tih sawiin, “ZPM hian Pathian kaihhruaina kan chang zel tih bak hi sawi tur a awm lo. Pathianah kan intulut a, kan minister rualten, ‘Keini chu kan ei ru ve lo vang’ tiin mipui hmaah thu kan tiam . Vawiin thleng hian eiruknaa kut fai lo hming pu hi sawi tur leh hmuh tur kan zinga kan awm lo te hi Pathian kaihhruaina vang a ni tih loh rual a ni lo,” a ti a, Pathian hnena lawmthu sawi zel turin an party mite a chah.
Nikumah khan ZPM Sawrkarin thlai thar leina budget-ah a dah tih sawiin Agriculture Minister chuan, “Handholding-ah kan dah a, kan ring nghal mai. Mah se, House-ah, ‘Khaw nge thlai thar leina tur in dah chu?’ tiin min zawt. Chumi a nih avang chuan kan CM-in ‘Lo dah tawh rawh u, a hranpain, Handholding-a dah loin, an hre thiam lo em mai’ a ti a, kum 2026-27 budget-ah hian thlai thar leina tur kan dah dawn a ni,” a ti.
Agriculture Minister chuan sawhthing chungchang sawiin, “Nikumah khan India ramah sawhthing rate a chhe em em a, ngaihtuah phak lohin a chhia a ni. Kg-ah Rs. 13, 14, 15 te a ni chho. A buyer kan biakte pawh an lo kal lawk thei lo. February 20-ah a rate a up loh chuan sawrkarin kan la ang, kan ti a sawhthing rate up loh karah sawrkarin kut hnathawktu te hnenah kg-ah Rs. 50-in, mipui kan tiam angin kan la a ni,” tiin season tawp thlengin support price nen kg-ah Rs. 50-in farmer-te hnenah pawisa a luh thu a sawi.
Nikum tun ang hunah sawhthing kg-ah Rs. 10 -13 vel a nih thu sawiin PC Vanlalruata chuan, “Tunah chuan sawrkarin a hun tiam a thlen hma pawh khan kg-ah Rs. 30 ten an hralh a ni. Mizoram sawhthing quality that bikna hi tunah hian India ram mai ni lo, khawvelin a hre tan mek a ni. Tunah pawh Marketing Board-in buyer kan zawn mek Mizorama rawn kal tam ber hi South India-a mi an ni,” a ti.
