ZPM leh MNF-in an candidate tlin an duh lo &#8211; Lal Thanzara

Vawiin (30.10.2025) hian Dampa Bial chhung khaw hrang hrang fang mek MPCC President Lal Thanzara, chuan Marpara, Pukzing Vengthar, Lenbuang (Bekabekya), Hnahva leh Silsury te tlawhin Congress Party zawmtu mithar 159 an lawmlut niin MPCC chuan an tarlang.

MPCC President chuan MNF leh ZPM-te’n an tlin lohin hla key an la a, an uai thla leh tawh nia sawiin, ‘Congress erawh mi thinlung hawn sakin kan awm a, nitin a hma aiin kan sang deuh deuh zel a ni. Tun by election-a Pu John Rotluangliana a tlin chuan chiang takin kum 2028-ah Congress a sorkar leh dawn tih nemnghehna a ni ang a, NLUP changtlung zawk hmangin Mizoram chhungkaw tin huapzo policy kan rawn kal pui leh ang,’ a ti.

Enchhin chaka tuihal enchhintute khan ZPM Sorkarin an beisei a phak loh em avangin sorkar an ninzia hi an titi lian ber leh an thunawn a ni tawh tih sawiin MPCC President chuan, ‘A bikin Aizawl khawpui mipui, sorkar hnathawkte-ah a nasa zual a ni. Tuna MNF Candidate hi Covid-19 laia Health Minister a ni. Khatih lai khan a department chan sum hman dan audit a ni thut kha tun thlengin Mizoram mipui rilruah zawhna chhan fiah theih loh a la siam reng. MNF leh ZPM Party-te hian an candidate tling se an duh lo, campaign pawhin an chhuak peih lo,’ tiin an kal chhunah an candidate-te miin an nuihzat theihna tur pawi an sawi sak niin a sawi.