Home

News

ZPM Sorkarin mipui min dah kham mek – MPCC

News

ZPM Sorkarin mipui min dah kham mek – MPCC

ZPM Sorkarin mipui min dah kham mek – MPCC

MPCC hruaitute chuan vawiin (4.11.2026) hian Aizawl Press Club-ah press conference koin,
ZPM Party-in sorkarna an chan hmaa an aupui tam ber chu Mizoram sorkar leiba chunghang a nih thu sawiin, “ZPM Party khan mipui vote zawnga an campaign lai khan sorkar kal tawhte chu nasa taka sum puk thin leh leibatna thang a Mizoram mipuite awktu ang hialin sorkar kal tawhte puhin, ZPM in sorkarna a siam hunah chuan sorkar leiba a tlem ang a, sorkar sum puk thin pawh tih bo hial tum angin an in zuar a nih kha,” an ti.

Sorkarna an chan theihna tur a nih beiseia Zoram mipuite hnena an tiam theih ang zawng zawng an tiam avangin mipuiten ZPM ah beiseina neiin an lo sorkar tir ta tih sawiin MPCC hruaitute chuan, “Sorkarna an siam hnuah erawh mipuia an inzawrh dan lo ang hlirin ro an rel ta emaw tih mai turin an khawsa chhunzawm a ni. Vote an zawn laia Zoram mipuite hnena Mizoram sorkar leiba chungchang an sawi dan leh sorkar kal tawhte chhe thei ang bera an puh dante kha Zoram mipuiten kan la hre reng awm e. Hetih karah hian kan hriat theuh angin Mizoram budget aia ‘leiba’ tam zawk kumin 2026 hian kan tawng leh mek. Kumin kan budget hi Rs 17,076.92 cr niin kan leiba hi Rs 19,085.15 cr vel a ni. Tun dinhmunah hian sorkar leiba hi Mizorama mihring nausen nen lam hian mi pakhatin Rs 1,45,000 (cheng nuai khat singli sangnga) vel ṭheuh anga leiba nei ang kan ni. Mizoram-a sorkar awm tawh zawng zawngah ZPM sorkar hi sum enkawl thiam lo ber sorkar an ni. Bat an huai em em a, kan tu leh fate rulh turin sum tam tak an puk reng a. Kumin 2026- 2027 kum kal mek (April to Oct) thla sarih chhung ringawt hian sum vbc. 5509 an puk leh tawh,” tiin nikum 2025-26 a sum puk vbc. 5308 crore aiin a tam tawh zawk thu an sawi.

MPCC hruaitute chuan kum 2008 inthlanpui a Congress Party-in sorkarna a siam chhoh atanga Mizoram sorkar lei bat chhoh dan leh sorkar sum puk chhoh dante tarlan tul an tih thu sawiin, “Zoram mipuiten thudik tak an hriat tha kan ti a ni.

Kum 2008 atanga Mizoram sorkar sum puk chhoh dan:

-Congress sorkar kum 10 (2008-2018) chhunga sum puk zat: 20407.37 Crore. Kum khat a pawisa puk zat chawhrualin: 2040.737 Crore

MNF Sorkar kum 5 (2018-2023) chhunga sum puk zat: 29772.24 Crore, kum khat a pawisa puk zat chawhrualin: 5954.44 Crore

ZPM Sorkar kum 3 (2023-2026) chhunga sum puk zat: 18911.51 Crore, kum khat a pawisa puk zat chawhrualin: 6876.89 Crore

Kum 2008 atanga Mizoram Sorkar leiba neih chhoh dan

INC kum 10 (2008-2018) chhung leiba zat: 5411.97 Crore. Kum khat a leiba zat chawhrualin 541.19 Crore

MNF: Kum 5 (2018-2023) chhung leiba zat: 7322.72 Crore, kum khat a leiba zat chawhrualin 1464.54 Crore
-ZPM: Kum 3 (2023-2026) chhung leiba zat: 7507.56 Crore, kum khat a leiba zat chawhrualin 2730.02 Crore

ZPM in zoram ṭhalaite hnena an tiam ‘CM Special Package’ lah chu a dawngtu ni turin ZPM Legislature meeting chuan ZPM nih a ngai tiin an pass hmiah nia sawiin MPCC hruaitute chuan, “Huapzo sorkar, tihbik awmlo sorkar, mahni party leh chhung leh khatte duhsak bik lo tura Bible nem meuha thu tiam a chhe chham party sorkar an ni tih theihnghilh thak khawpin ZPM sorkar hi a kal mek a ni. Mizoram sorkar leibat chho dan leh sum puk chho dan kan en chuan ZPM Party-ten mipuite hnena an intiamna an ngai pawimawh lo mai ni lo, thu an tiamna Zoram mipuite an ngai nep hle tih a lang. Hun reilote sorkarna an chan atangin Mizoram sorkar leiba a pung nasa hle a, Kum 2026-2027 Mizoram sorkar budget 17076.92 crore anih laiin, Mizoram sorkar leibe neih mek chu 19085.15 crore zet a ni thung. Kan State sorkar budget ai a kan state leiba tam zawkna hi 2008.23 crore zet a ni. Hetiang ang em em a kan ram sum dinhmun a chhiat hi a la awm ngai lo a, ZPM sorkar hi leiba thangah a awk mek,” tiin ZPM hian Zoram mipuite min dahkham mek thu an sawi.

More Posts

MPCC-in resolution an pass

MPCC chuan vawiin (18.11.2026) chhun khan Congress Bhavan-ah executive meeting an nei a, MPCC President Lal Thanzara’n politics a khelh chhan a sawi bakah, resolution an pass. Lal Thanzara chuan politics a khelh chhan chu chief minister nih a nih loh thu sawiin, “Ka tum ber chu kum 2028-a Mizorama Congress a sorkar ngei theih […]

Zanin Youth Icon chhunzawm dawn

EverHome Youth Icon 2026 third round intihsiakna chu zanin (18.11.2026) dar 8-ah neih leh a ni dawn a, Youth Icon 2024 Lalsangliana (Taitea) chuan amah lo endik tawhtute dawhkan tawmin guest judge-ah a tang dawn. Third round intihsiak zan khatna chu Thawhlehni zan khan LPS Studio, Zarkawtah neih a ni a, a zan hnihna chu […]

Lokyukta-in report an thehlut

Mizoram Lokayukta Act, 2014 bung 47-nain a phut angin Lokayukta Chairperson Lalmalsawma, IAS, (Rtd.) chuan vawiin (18.11.2026) hian Larsap General Vijay Kumar Singh hnenah Mizoram Lokayukta Annual Report Pasarihna a thehlut. Annual report hian April 1, 2025 atanga March31, 2026 inkar a huam a, Mizoram Legislative Assembly thutkhawmah pharh a ni ang. Lokayukta Chairperson hi […]