ZPM Thalai hruaitute chuan vawiin (28.10.2026) chhun dar 12 khan Home Minister K Sapdanga chu a office-ah lenchilhin, Operation Triden avangin lawmthu an sawi. Operation Trident-a Mizoram Police, Narcotics Control Bureau leh Directorate of Enforcement ten Joint Operation an kalpui mekah hlawhtlinna tam tak an hmu chu lawmawm an ti a, joint operation-ah theihtawpa hmalakpuitu NGO-te chungah pawh lawmthu an sawi.
Home Minister K Sapdanga chuan tunhnaia Operation Trident an kalpui dan chungchang sawiin, “Operation Trident-ah hian a tha thawh tam ber chu kan Mizoram Police-te an ni a, thuruk an thup thei em em a, leak out pakhatmah awm loa hma kan la thei kha a lawmawm hle . Central lam pawhin he operation-a tel Mizoram Police mi leh sateah tham theih emaw, thu ti put ru an awm loh avangin kan police-te an fak hle a ni. He operation hi a la tawp loa, la kalpui zel tur a ni a, Police leh Excise-te hmang chauhva tih hlawhtlin theih a ni lo. kan NGO tawhpuite pawhin tha taka min thawhpui chhunzawm zel kan beisei a, he operation hlawhtlinna ah hian kan NGO-te an pawimawh hle a ni,” a ti.
ZPM Thalai President Jeje Lalpekhlua, MLA pawhin thu sawiin, “Tuna kan Home Minister kaihhruaina hnuaiah hian Mizorama thalaite kan thla a muang sawt tawh hle. Sawrkar hmasa lam atang tawhin ruihhlo leh dan phal loh thil tawlhrukna a nasain Mizoram thalaiten kan vei hle. Sawrkar a chet loh chuan vei leh hmalakna a sawt thei loa, tun dinhmunah erawh kan Chief Minister leh Home Minister-te thawhrimna leh a hlawhtlinnate hmu chho zelin, ruihhlo pawh Mizoram khawtualah a vang chho zel. Kuhva leh bungraw dang tawlhruk pawh a kiam chak hle,” tiin Mizoram Police Recruitment dik leh felfai taka kalpui a ni te hian Mizorama kan thalaite thla a ti muang leh zual nia an hriat thu a sawi.