Doctor awm loh vangin phurlet
admin 27-May-2024 05:50 PMSiaha Bialtu Dr K Beichhua chuan Siaha District Hospital-a damlo enkawltu doctor awm loh avanga damdawi in atanga phurlet chungchangah vawiin (27.5.2024) hian Health Minister Lalrinpuii hnenah lehkha a thawn thu a tarlang. Vawiin vek Health Minister hoin department hotute an thukhawm.
Dr K Beichhua chuan Health Minister hnena lehkha a thawnah hian nimin zing dar 6 khan Lenchii (90) of Siahatlah III chu accident avangin Siaha District Hospital emergency panpui a nih thu tarlangin, 'Rilru natthlak takin dar 2 thleng doctor tumahin an attend lo a ni awm e. Hei vang hian a chhungte lungawi lo chuan rilruna takin casualty atangin in lamah an inlalet ta mai. Heihi keimah ngei pawhin ka hriat in, ka biala thilthleng a nihna angin pawi ka ti a, lainatawm pawh ka ti,' a ti.
Siaha District chu district senior leh damdawi-in pawh Mizorama a senior ber zinga mi a nih thu tarlangin Dr K Beichhua chuan, 'Sorkar pawhin min ngaipawimawhin, a theih chin chinah doctor tha tak takte pawh min dahsak a, lawmawm ka ti hle. Chutihrual chuan he thilthleng hi medical negligence a niin a lang,' tiin hmalama an kal chhoh zelna turah thleng nawn tawh lo tur leh kan doctor-te pawhin mipui rawng tha zawka an bawl theih nan lo hriat saka, a tul anga hma lak sak turin a thlen.
Siaha District Hospital, Siaha-a doctor awm loh avanga damlo inentir pakhat, beidawnga an hawpui thu hriat anih veleh Health Minister Lalrinpuii chuan Health Department lam hotute chu thil awmdan chhuichiang turin a hrilh nghal. Thuchiang an hriat hnu, vawiin chawhnu lam khan a office-ah Health Department official-te a thukhawmpui nghal bawk.
He thil duhawm lo thleng hi Health Minister chuan pawi a ti hle a, tun hnuah hetiang thil hi thleng leh tawh lo turin a hriattir nghal a ni.