A tahtawla puanzar an rel

Vawiin (6.10.2026) hian MNF Policy & Programme Committee chu an chairman Dr. R. Lalthangliana, MLA hoin an party office-ah an thukhawm a, MNF-in policy a lo neih tawh sa bakah, khawvel hmasawnna mila siam danglam leh belh ngai tam tak, ram leh hnam hmasawnna tura an duan te chu mipuiah a tahtawla puanzar ṭan nise, an ti.

MNF tarlan danin, Dr. R. Lalthangliana kaihhuai MNF Policy & Programme-te hian ngaihdan zau tak mipuiah an la kual tawh a ni. Kohhran hrang hrangte chu an hmunpui – headquarters/office-ah kal chilh vekin kohhran leh khawtlang nun, ram hmasawnna tura an duh dan leh beisei dante an la khawm a, heng bakah hian pawl hrang hrang duhdante pawh an la khawm tawh a ni. MNF General Headquarters-in Mizoram khawtin tlawhchhuah programme October – November 2026 chhunga a neih turah policy leh programme a ṭhen azar chu thu hlawm mumal hrang hrang neia puan chhuah ṭan tura buatsaih chu ṭha an ti a ni.

Kut hnathawktute hamṭhatna tur chungchang te, sorkar sum harsatna sutkian dan tur te, health care scheme ṭha zawk leh awlsam zawk, kawngpui ṭha leh tlo neih dan tur te, Mizo nationalism ṭhangthar te thinlunga tuh thar dan tur te, mi rethei zawk te lei rem rah theih dan tur te, education hmasawnna tur te, power-a hmalak dan tur leh sorkar hnathawk leh pension-te hamṭhatna tur chungchang te, zu leh ruihhlo vanga buaina tawk chhanchhuahna tur te, remna thuthlung avanga lo haw MNF returnee te leh martar family te chungchanga hmalak dan tur bakah a dang dang pawh a tahtawl zela puanzar ṭan an rel a ni.

MNF Policy & Programme ṭhukhawm hi MNF Working President Tawnluia’n a telpui a, committee member kal an ṭha hle a ni.