Vawiin (20.11.2026) chawhnu dar 2:00 khan Kolasib Bawrhsap H. Dolianbuaia chuan Saipum leh Saiphai khaw inkar ramri lung (village boundary pillar) a phun. Hemi hnu hian Govt. Middle School, Saipum-ah khaw pahnihte ramri inhlanna leh inremna thuthlung ziahna hun an hman chhunzawm.
Kolasib Bawrhsap chuan thu sawiin, “Harsatna leh buaina a lo thlen changin a chinfel dan zawn chu kan mawhphurhna pawimawh tak a ni. Khawvel chanchin (history) han thlir let hian indo leh innghirnghona chuan chhiatna leh thil ṭha lo hlir a thlen ṭhin tih kan hmu a, chutiang kara khaw pahnihten inngeih taka inremna an nei thei chu a lawmawm takzet,” a ti.
Saiphai Village Council-in July 10, 2025-a Saipum leh Saiphai ramri siam rempui tura Joint Village Council, Saipum an lo dil tawh angin, September 4, 2025 khan Saipum Joint VC, NGO-te, political party-te leh khawtlang hruaitute ṭhukhawm chuan ramri siam rem hi ṭha an lo ti tawh a ni. Hemi bawhzui hian vawiin hian Kolasib Bawrhsap leh District Local Administration Officer (DLAO) hriatpuinain Saipum VC-I, Saipum VC-II leh Saiphai VC-te chuan ramri siam remna thuthlung hi an ziak fel ta a ni.
Ramri Inrina (Boundary Alignment) Tlangpui hi a hnuaiah tarlan ang hi a ni:
Serkhan to Bagha Road, D. Thangmawia huan kawn aṭangin: khawthlang lamah: D. Thangmawia (Saipum) leh Laltlanhlui d/o Lalrinliana (Saiphai)-te huanram inrina luikawrte zawh thlain Chhimluang lui a fin ang a, chhim lam hawiin Chhimluang lui zawh thlain Serlui ‘B’ Tuikhuah a man thla ang.
Khawchhak lamah: Remsiama s/o Rangkhuma (L), Kolasib Hmarveng leh Lalramliana (Marama) leh Lalhmahruaia (Saiphai)-te huanram inrina luikawrte zawh thlain Mualkhang lui a fin ang a, hmar lam hawiin Mualkhang lui zawh thlain Pialthleng lui a man thla ang a, Pialthleng lui zawh thlain Notosora lui a zawh tlang thla zel ang.